Kunyit chelum: Sakang seribu guna

ENGKA mayuh orang enda kala meda, enda ngelala tauka enda nemu utai tumbuh beakar ti dikumbai kunyit chelum tu kebendar bisi tumbuh.

Ba Malaysia, bemacham bansa kunyit enggau guna baka kunyit kuning enggau kunyit burak sereta ke bukai.

Kunyit chelum sebansa kunyit ti jarang ditemu, chukup nyelai laban bechura chelum nundaka nama iya. Enti suba, kunyit bansa tu mar digiga enti ukai ba kampung.

Taja pia, nipakka pemansang teknologi betanam betupi, kunyit chelum ulih ditanam lalu paung bisi dijual sebelah palan bejualka paung buah enggau bungai nyengkaum ulih dibeli chara online baka ba Lazada.

Bepelasarka pansik dipejalai raban bepenau, kunyit chelum ngundan mayuh pengelebih enggau manahka pengerai enggau ngaluska kulit, tau dikumbai kitai sakang seribu guna.

ANANG SARU… Baka tu gaya lambar daun kunyit chelum kebendar.

Mayuh utai diundan kunyit tu nadai ditemu ba utai tumbuh ubat bukai.

Ambika chunto, penyampau karkumin dalam kunyit chelum chukup manah nyumanka rengka dalam tubuh ti rusak tauka ngeraika orang ke sakit raya.

Ari pansik nya mega madah kunyit chelum tu sebansa utai tumbuh tau ke ubat ti ngembuan pengulih besai ba makit sekalika paung tauka akar kunyit nya empu digagaka ubat.

Buah kunyit diinjin dulu nyadi repu sebedau ditepu dalam kapsul lalu nyadi ubat nyumanka mayuh macham penyakit sereta ulih nyadi suplimen.

Ba menua Thailand, paung kunyit chelum dijual manggai RM200 sekilo nyengkaum bayar tambang lalu ulih diterenak dulu dalam polybag sebedau dijual ngagai penguna.

Untung diulih ari paung ke dijual tau dua kali lipat ari rega kitai meli paung nya, ukai semina ulih mulaika puku tang bulih untung besai.

Tambah mega paung ke diterenak dijamin tumbuh galak, nadai beleman, asal chukup jaga enggau intu laban penyelap enggau pengangat gaya hari nadai jauh bida entara Thailand enggau Sarawak.

Menua Thailand mega ngelar utai tumbuh tu ‘viagra’ asal tauka nama saintifik iya, Kaempferia parviflora, laban manahka pengerai tubuh kelebih agi sida ke lelaki.

Nitihka penerang, kunyit chelum tu ngundan isi pemakai ti ulih nyeliahka jugal, igi penyakit ba rengka tubuh sereta enda ngasuh gemuk. Chara iya, uji irup ai rebus kunyit chelum ninting hari.

UBAT SERIBU GUNA… Ai rebus kunyit chelum ulih diirup ke pengerai tubuh.

Kunyit chelum ulih digagaka rempah dikumbai jamu ti manahka indu baru udah beranak enggau benung bekindu. Sida tau ngirup ai rebus kunyit ti ulih nuchi darah enggau ngedutka serangan anak.

Kelimpah ari nya, kunyit chelum tau ke penawar rachun. Isi kunyit ditutuk tenyuh lalu ditampal ba abi kena ketup utai bisa baka pantuk ular tedung, sengat kala enggau gamang enggau ke bukai.

Nambahka nya, kunyit chelum dikena ba chara perubat asal raban bansa China. Kunyit chelum ke udah disimpan betaun pengelama dikena ngubat orang ke jukat, nyumanka abi demaram, ngelanchar pejalai darah enggau nganchur darah meku.

Baka udah disebut dulu tadi, kunyit chelum manahka pengerai tubuh kelebih agi sida ke lelaki ke bisi penanggul baka maku. Kunyit disirap mipis lalu dichampur enggau ai angat. Irup pagi enggau lemai ninting hari, tubuh deka berasai regas.

Kunyit chelum mega dipelaba ulih nagang igi penyakit riman gelung perut, nagang Osteoarthritis tauka pedis buku tulang, ulih nurunka tikas kolesterol enggau nyumanka orang ke pedis isi.

Tu nyengkaum pengerai sistem injin dalam perut, sakit ampus, penyakit tungkul atau, lubah tuai, semua, raing enggau penanggul kulit merejan.

Sida ti rindu nanam utai tanam ke ubat, kunyit chelum tu entara utai tanam beakar ke enda tau nadai ditanam ba kandang ngelingi rumah, sekeda ditanam dalam pasu mit ti digitang tauka diteju ba atas tanah aja.
Bisi mayuh kunyit ke nyau deka sama enggau gamal kunyit chelum ke endar nyengkaum ari lambar daun lalu buah beakar ti bechura chelum tauka unggu nya ukai semeseti iya kunyit chelum kebendar.

Nya alai bejimat enti sema bisi paung ke dijual enggau rega mudah laban kunyit chelum ke asal jarang ditemu enggau dijual sepeneka ati.

Tambah mega, pedagang ke nyual paung kunyit chelum enda tau enda bisi pemendar ari piak bekuasa bekaul laban dikena nyaga utai tumbuh bansa tu ari punas.