KUCHING: Stesyen radio Kupikupifm ari Sabah deka betemu rasmi enggau bala peninga radio Sarawak kena 9 June tu.

Pengawa bejadi Kupikupifm deka dipenyadi Menteri Dagang Temuai, Industri Kreatif enggau Seni Pemerindang ti mega Menteri Nembiak, Lumba enggau Main sereta Pemansang Orang Dagang, Datuk Seri Abdul Karim Rahman Hamzah ba Opis Kupikupifm, Jalai pending.

Menijar Program Kupikupifm, Gideon Jute madah, program radio ti deka ditabur nengah frekuensi 92.5 ngembuan lima segmen ti ngemerat pekara bekaul komuniti.

“Kitai bisi lima segmen baka segmen ngirup pagi ‘Sekoh Pagi’ berengkah ari pukul 6 nyentuk 10 pagi lalu pukul 10 pagi nyentuk 1 lemai deka diisi ngena segmen ‘Rona Roni’.

“Pia mega, berengkah ari pukul 1 nyentuk 4 lemai diisi ngena segmen ‘Kacak Tipot’, pukul 4 lemai nyentuk 8 malam ungkup segmen ‘Kupi Jem’ sereta segmen ‘Jungo Krem’ berengkah ari pukul 8 malam nyentuk 12 tengah malam,” ku iya.

Gideon mansutka jaku nya rambau ngatur penemuai basa ba Opis Suara Sarawak enggau Sarawak Tribune, ditu kemari.