KUCHING: Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit (KWKPK) deka bekerejasama enggau Universiti Malaysia Sarawak (Unimas) ngaga pansik bekaul enggau isu nembiak indu betubuh bisi.

Menteri KWSPK Datuk Seri Fatimah Abdullah madahka pansiknya digaga ba Sarawak taun tu ngambika ulih nemu silik kebuah kes nya nyadi.

“Ngarapka asil pansik kes nya ulih pansut sereta ulih dikunsi maya taun 2022 ila.

“Berebak enggau nya, kami ulih ngejalaika Program Intervesi berpelasarka perambu enggau asil ripot nya tadi,” ku iya.

Fatimah madah munyi nya ba aum pemberita sepengudah aum One Stop Teenage Pregnancy Committee (OSTPC) di Begunan Baitulmakmur ditu, kemari.

Tambahka nya, Fatimah ngelalau gerempung ukai dikuasa perintah (NGO) enggau ejensi ke bukai numbuhka ‘Baby Hatch’ (palan engkah anak mit baru ada) dikena nyeliahka anak mit ke baru ada ari dibuai sengapa.

“Ninting nyawa anak mit amat beguna laban sida tu ila ulih meri pemaik ngagai komuniti,” ku iya.