Suara Sarawak bisi ngerandau Ketuai Direktor Kaunsil Lada Malaysia (MPB) Stanley Liew di Opis MPB apin lama ke udah.

Ulih tuan nerangka baka ni pengerembai industri lada di Sarawak?

Kebendar baka tu di menua Malaysia, industri lada mayuh dikereja pekebun mit iya nya nyau deka semak 99 peratus.

Mimit aja orang ke nyengala betanam lada chara komersial di Malaysia.

Sarawak nyadi menua nanam lada pemadu mayuh laban mungkur 90 peratus pengeluar lada di Malaysia.

Tu bereti urung 7,500 hektar pengeluas tanah nanam lada ti bisi di Sarawak endang pekebun mit.
Urung 3,500 iku pekebun lada di selampur Malaysia lalu sida ngeluarka urung 30,000 metrik tan lada ninting taun.
Taun tu, kitai melaba ulih ngemansutka asil lada manggai 30,000 tan metrik.

Lada ti dikeluarka taun tu bisi nurun 10 ngagai 15 peratus ketegal pandemik Covid-19, gaya hari enggau ke bukai.

Kati Covid-19 meri pangka ngagai industri lada di Sarawak kelebih agi pekebun di menua pesisir?

Covid-19 endang meri pangka ngagai industri lada, tang tebal agi pekebun lada ti diau ba menua pesisir lalu sida agi bejalaika pengawa baka selama.

Pun iya, sida endang irau ngagai Covid-19 laban enda nyengala meretika atur nya baka maya bulan March tu tadi.
Nya ti ngujungka sida ngelakka kebun pia aja lalu enda diintu manah. Pekara nya meri pangka ngagai pengeluar buah lada sida.

Kedua, pekara nya ngujungka proses ngarang lubah laban proses ngarang lada digaga ba bulan April tang taun tu sida bepun ngarang lada ba bulan Jun iya nya pengudah Atur Tagang Pejalai (PKP) badu.

Taja pia, selampur dunya endang nerima pangka laban lebuh kitai deka eksport lada ti dibeli ari pekebun, lada nya mesti diproses dulu.

Nyadi, sepengelama timpuh tiga bulan maya PKP iya nya bulan March, April enggau Mei, kami berenti ngaga semua proses lada.

Nya ngujungka pengawa nginjin lada ti deka dijual ngagai menua luar ari MPB enggau sekeda kilang bukai bisi tejanggal.

Diatu, Covid-19 endang meri pangka ngagai pekara nya, tang udah PKP kitai ulih ngambi pekereja baru memproses lada lalu nangkup peminta ti dianti sida pemeli.

Ketegal Covid-19 mega peminta lada di selampur dunya bisi kurang. Nya meri pangka besai ngagai rega lada ba makit dunya.

Rega lada bisi niki mimit udah PKP, tang diatu nurun baru.

Bisi kini perintah meri bantu ngagai pekebun maya tu?

Bantu ti keterubah iya nya nanam lada baru. Bantu tu sebaka enggau bantu taun siti nyin kemari, tang taun tu kami ngagihka RM7 juta dikena mantu sida ti deka nanam lada baru.

Pekebun baru ti bisi kebun lada deka dibantu MPB nengah subsidi skim bepanggai ngagai pengeluas tanah sida.
Kelimpah ari nya, bantu baka baja, paung enggau tiang lada mega bisi diberi.

Iya ti kedua, maya Covid-19 Perintah Besai udah ngemendarka Pakej Ransangan Ekonomi (Pre-Prihatin) penyampau RM16.11 juta ngagai MPB dikena mantu orang bekebun lada meli perengka kena bekebun.

Enggau agih belanja tu urung 5,370 hektar tanah nanam lada enggau urung 30,000 iku pekebun lada mit teulihka pemaik selampur Malaysia.

Bantu tu endang mantu pekebun mit dalam bejalaika aktiviti kelebih agi maya pengerekai Covid-19.
Diatu kami agi dalam proses milih pekebun lada ti engkeman nerima bantu enggau benung nyadung baucher ngagai sida ti dipilih awakka ulih meli perengka kebun lada baka baja, changkul enggau ke bukai.

Au pia nih, baka ni chara pekebun minta bantu nya?

MPB bisi siti sistem ti dikumbai e-Pekebun iya nya sistem ti dikena kami ngulihka penerang pasal bala pekebun ti berejister.

Enti bisi sekeda ari sida bedau nerima bantu Pre-Prihatin tu, sida tau ngaga peminta ari e-Pekebun.
Kami bisi sistem ke ulih milih orang nya patut bulih bantu bepanggai ngagai atur ti udah ditetap.
Atur tu nyengkaum orang nya siku pekebun lada, bisi tanah, bisi kebun lada tuai pengabis nadai pengelama tiga taun enggau ke bukai.

Lima taun deka datai, nama penyadi industri lada ditu?

Industri lada dijangka deka terus ngerembai. Ba tikas dunya industri tu endang besemekih laban menua kitai ba penuduk kelima menua pengeluar lada.

Nya alai, industri tu majak besemekih laban udah mayuh menua bukai nanam lada baka Vietnam, Indonesia, India, Brazil enggau ke bukai benung ngeluarka mayuh lada.

Sida mega muntang nyual lada laban ungkus nyual ti enda besai.
Taja pia, kitai meda pekara tu ari sukut ti bebida iya nya kitai deka ngeluarka lada bekualiti khas baka lada Sarawak. Lada Sarawak nyelai laban kualiti iya udah diterima selampur dunya.

Bau lada Sarawak jauh tajam enggau pemisa lada tu bebida ari lada ti dikeluarka menua bukai.
Kelimpah ari nya, kitai mega ngeluarka sepur lada burak (bechura krim) ti bulih peminta selampur dunya.

Enggau strategi tu, kitai enda deka besemekih enggau menua bukai sentang rega, tang meda ngagai bida kualiti enggau produk.

Ba sukut pemansang teknologi, baka ni pangka teknologi digital ngagai industri lada?

Sebedau tu kami udah ngena teknologi dalam mantu pekebun lada.

Ambika chunto, kami bisi aplikasyen ngena telefon binching ti dikumbai Dr.Lada.

Bala pekebun lada ulih ngena aplikasyen tu nyema bisi penanggul ngagai lada ti ditanam sida baka daun kuning, tumpuk chelum enggau ke bukai dikena ngiga pun penyakit lada.

Kelimpah ari nya, Dr.Lada ulih madahka chara mutarka penanggul nya baka rachun ti engkeman ngubat lada.

Tu entara teknologi ti udah dipunka kami. Baka nya mega, enggau e-Pekebun ti dipadahka aku tadi.

Nya kebuah lebuh perintah meri bantu Pre-Prihatin kami ulih meri bantu nya enggau lengkas nengah sistem E-Pekebun ti udah bisi.

Seriris enggau pengeremai ekonomi digital, nama atur MPB dikena nyapai juluk tu?

Kami deka ransing gawa enggau benung bekerjasama enggau ejensi bukai ngambika ulih meda guna ‘Internet untuk Segalanya’ (IoT) ungkup mantu nanam lada enggau perengka penyidi dikena nemu penatai lada awakka kami ulih meri penerang ti betul ngagai pemeli.

Ambika chunto, sepur lada burak tebilang datai ari Betong.
Kelimpah ari nya, kami mega endang meratika pekara pekebun moden nengah betanam betupi pintar baka ngena dron dikena nyembur baja tauka perengka bukai ti ulih dikena.

Lebuh IoT dikena ba kebun, pekebun ulih nemu nyema lada sida bisi kurang ai tauka baja, dia sistem ai enggau pengawa meri baja ulih digaga automatik.

Pekebun lada enda ibuh ngangkut ai enggau baja ngagai kebun sida.
Entara chunto bukai iya nya enti IoT ulih ngelala tanah endur bekebun nya kelalu beasid, nyadi sida nemu nama pekara ti ulih digaga dikena mutarka penanggul nya.

Laban enti tanah kelalu beasid pun lada enda ulih nginsap baja lalu ngujungka pun lada nya tasal.

Kati gaya timbal nembiak rebak baru ngaul diri dalam industri lada di Sarawak?

Pekara tu siti ari pengirau kami ngagai industri lada di Sarawak laban industri tu endang dikereja bala orang tuai.
Kaul nembiak rebak baru endang agi mimit. Sida enggai neruska pengawa bekebun lada di menua pesisir.

Sida rindu agi ke mengeri gawa ba opis enggau nyadi kuli ba kedai kupi kelimpah pengawa bukai.
Nyadi, nama ti digaga MPB iya nya nguji deka narit minat nembiak rebak baru bekenaka teknologi enggau digital lebuh nanam lada.

Nama bagi program ti ulih rebak baru tau rinduka industri lada?

Nengah guna digital enggau teknologi dagang kebun lada, kami andalka ulih narit minat nembiak rebak baru ngaul diri dalam industri tu.

Kami mega deka merambu ngatur program di sekula vokasional ungkup nyeridi nembiak tauka nembiak ti minat ngagai aktiviti bekebun lada kelimpah bekerejasama enggau Opis Betanam Betupi dikena ngelala nembiak ti beminat ngagai pengawa betanam betupi moden.

Nengah chara tu kitai ulih ngerembaika industri lada ba timpuh ti deka datai.

Nama pengarap nuan ngagai industri lada di Malaysia kelebih agi di Sarawak?

Objektif MPB endang deka mantu pekebun lada ngambika sida ulih bulih penguntung enggau nyadi pekebun ti mujur.

Dalam nyapai objektif tu kami mesti ngemansangka ‘produk pemun’ enggau pemanah produk.

Kami mega bisi Unit Pansik enggau Pemansang (R&D) ungkup ngiga guna baru ari lada.
Ambika chunto, kitai ngemansangka sos lada chelum. Aku ngarapka kitai ulih nyual produk tu ngagai selampur dunya ukai semina di Malaysia tauka Sarawak.

Nyadi, semua orang ulih meli enggau makai sos nya baka kichap, sos tomato enggau sos chabi.
Endang nyadi pengarap besai aku enti kitai ulih nyual sos tu ngagai Restoran Makai MacDonald enggau KFC.

Nyema penguna ngudar pemakai sida deka ngiga sos lada chelum.

Kitai mega deka ngemansangka mayuh agi produk bukai ari lada.

Aku udah minta R&D ngemansangka ai irup ngundan lada baka 100 plus enggau Coca-Cola.

Lada ukai semina ulih nyadi barang pemakai tang mega ulih nyadi produk bukai baka perengka pemajik gamal, pemanchit indu utai enggau minyak angit.