Pembantu pergigian maut dalam nahas jalan raya

Lagu baru Ruby J – Enggai Bai Beserara mujur masuk Charta Lagu Tebilang Cats

Facebook
Twitter
WhatsApp
Telegram
Email

“Nyadi siku pemerindang patut nyikap diri enggau mayuh penemu,” ku siku penanyi baru mai lagu Enggai Bai Beserara, Robbia Jarup tauka dikangau Ruby J.

Penanyi asal ari Sadong Jaya, anak tuai ari dua iku diri menyadi ke mega bekulit burak sereta ngembuan tuchum manis tu udah bisi batang pengawa tetap nyadi pengajar ba Sekula Primari (SK) Nanga Delok, Lubok Antu.

Ruby J ngembuan sada nyawa ke chukup lunak sereta manding mai lagu genre balada.

PUN PENGAWA BELAGU

Maya dirandau Suara Sarawak, Ruby J madah ngembuan pengerindu belagu kenyau ari mit lalu selalu belagu begulai enggau bala bakih tiap kali bisi pengerami.

“Belagu ngasuh ati rindang ulih ngubat runding ti tusut,” ku Ruby J.

ENGGAI BAI BESERARA…Lagu solo kedua Ruby J ke benung tebilang ba Radio Cats Fm.

Ruby J berengkah ransing belagu ba pengujung taun 2019 lebuh iya dibai bala bakih ngaga siti album Kompilasi Sada Jauh Lemai.

Dalam kompilasi album nya bisi 10 iku penanyi bukai begulai enggau Ruby J. Lagu ti disadaka Ruby J dikumbai Enggai Saum Tangkai ditengkebang Matthius Mambang seduai Jesly Jabu.

“Ari 10 iku bala kami dalam album kompilasi nya sembilan iku bala pengajar lalu siku supervisor buding,” ku Ruby J.

MASUK CARTA CATS

Bulan Julai 2021 tu tadi album solo ke dua Enggai Bai Beserara ari Ruby J lalu penengkebang lagu tu mega Matthius Mambang enggau Jesly Jabu dibaruh perabung Aka Dambai Production.

Lagu kedua tu mujur mai nama Ruby J majak dikelala ba dunya pemerindang.

“Aku berasai chukup temegah laban lagu Enggai Bai Beserara tu udah masuk Carta Lagu Tebilang Cats lalu ba penuduk lumur dua minggu tu.

“Ngarapka semua bala ti rinduka lagu aku terus nyukung aku ambika ulih beretan dalam Charta Lagu Tebilang Cats,” ku iya lebuh ngelansa kenang lagu solo kedua nya.

ALBUM KETERUBAH…Kompilasi Sada Jauh Lemai keterubah alai Ruby J neleba diri ba dunya pemerindang.

JAKU PERANSANG

“Juluk ati enggau pemujur pengawa ba dunya tu enda tentu ulih diperumban kelebih agi enti utai nya bekait enggau nasit tauka jereki.

“Enggai tauka deka kitai mesti besabar lalu nyerahka semua ngagai Petara,” ku iya.

Sekumbang betapi enggau penanggul Covid-19 mayuh pengawa tejanggal kelebih agi pengawa ke seruran dikereja kami sebuat raban penanyi.

Sebedau tu bala kami ari Sri Aman suah nurun ke Kuching belatih belagu ngena chara ti engkeman agi.

Sebedau nutup randau, Ruby J ngelalau semua penanyi baik nya baru tauka lama sama bela begempung ngambika pengawa pemerindang terus mansang maju sama sebaka enggau lagu bansa bukai.

PENGAJAR…Ruby J ngembuan batang pengawa tetap iya nya benung ngajar ba SK Nanga Delok, Lubok Antu.

e-Akhbar Suara Sarawak

Berita Berkaitan

E-Paper

27 Mac 2023

Berita Terbaru