PENANYI tebilang Iban ti nyadaka lagu Dendam Enda Padam endang enda kala ngelebu bala peminat industri muzik Dayak.

Sekali tu, iya datai baru enggau lagu single pemadu baru ti diberi nama Enggai Tundi Dek lalu trending ba penuduk keempat ba pelasar YouTube.

Penanyi bepenau ti ngempu nama Lucy Mapang sereta tampak agi dikelala enggau nama Lucy M ngembuan penyelai sada nyawa kediri empu sereta ulih nyadaka lagu bemacham rentak.

Lagu berentak ranchak nya mujur dikeluarka kena 5 Mei tu tadi ba baruh perabung Panggau Buluh Pengerindu (PBP) lalu ulih dipeda ba pelasar YouTube PBP empu.

Urung tiga minggu udah pansut ba pelasar YouTube, lagu nya mujur dipeda lebih 880,000 kali sereta nerima 12,000 kelai like ari mensia mayuh.

ENGGAI TUNDI DEK
Ngelansa cherita dalam lagu nya, Lucy M madah, lagu nya nadai nyengala bisi jalai cherita tang nya semina ngundan jaku lalau ngambi kitai seruran ngemaruhka diri.

Ku iya, kebuah pia laban kemaya hari tu mayuh orang kerah-kerah bejaku besai, sumbung, udu bula lalu udu deka berekak tang kebendar mayuh agi pemula.

“Buah runding ngaga lagu Enggai Tundi Dek datai lebuh kami duai Embat Lala bekunsika chara dikena ngaga lagu ti dikerinduka mensia mayuh.

“Iya madah ngagai aku manah ngena leka jaku ti suah dikena tauka disebut mensia mayuh besehari-sehari lalu kami duai milih jaku ‘Enggai Tundi Dek’.

“Taja pen lagu tu bisi mangka pengidup orang ti rindu bejaku lawa ngeninggika diri tang tuju ngaga lagu semina deka betundi aja,” terang iya.

Iya ngelalau mensia mayuh ngambi seruran ngemaruhka diri lalu anang bejaku lawa, sumbung tauka ngeninggi kediri.

Ku iya, kitai patut mendingka penemu orang bukai, begulai manah enggau pangan diri sereta seruran nyebut utai ti amat.

PENGERINDU BESAI
Penanyi bajik penakan Iban Penan nya endang ngembuan pengerindu besai ba pengawa belagu lalu nya endang dikembuan iya ari mit nyentuk diatu.

Indai iya madah, lebuh umur agi dua taun suba, Lucy M endang udah rindu ke pengawa belagu lalu enti niang apai iya nebah gita, iya deka duduk ba tisi apai sambil belagu.

Laban ti nemu pengerindu iya ba pengawa belagu, nya alai bala pengajar suah ngasuh iya belagu maya bisi program tauka pengerami sekula.

RANSING BEPEKIT
Pandak jaku, laban ti angkun amat ba pengawa belagu, nya alai, pengawa nya endang udah nyadi sebagi ari pengidup Lucy M.

Ukai semina suah belagu ba sekula, penanyi tebilang Dayak nya suah ngeruh ai enggau orang masuk bemacham pekit belagu maya agi biak suba.

Laban ti udah lama jeman agi biak suba, Lucy M nyau enda ingat penyuah diri enggau orang masuk pekit belagu.

Tang naka ke ulih dikeingat iya, Lucy M kala enggau orang bepekit belagu urung lapan kali sekali ke nya ba Bagi Menua Bintulu tauka ba endur bukai baka Sibu.

Ba lapan pekit belagu nya, iya endang ngempu gelar champion iya nya tiga kali ba Bagi Menua Bintulu enggau lima kali ba Bagi Menua Sibu.

Lebih manis lebuh iya mujur menggi gelar champion ba Pekit Sibu Jaya Idol 2005 nengah lagu Power of Love ari siku penanyi tebilang dunya, Celine Dion.

Pekit nya diatur begulai Amcorp enggau TV3 lalu semua akim ba pekit nya endang ari Semenanjung Malaysia.

Lucy M mega kala champion ba pekit lagu China ba taun 2008 suba.

Kelimpah chakah masuk bemacham pekit belagu, ku tusui Lucy M, iya berengkah merindang mensia mayuh ba Funfair rambau iya agi ba Pom Dua suba.

PEJALAI MERINDANG
Tuah manuk dipeda ba kaki lalu tuah mensia nadai siku nemu.

Pejalai Lucy M ba dunya pemerindang industri muzik Dayak bepun ari sebengkah pengawa nguji penau ti diatur TV10 Production ba Bagi Menua Sibu ba taun sebaka.

Rambau nya suba, iya nyadaka lagu ari penanyi legend ti chukup tebilang enggau sada nyawa pemadu tinggi iya nya lagu Celine Dion sereta Ziana Zain.

Penau belagu enggau penyelai sada nyawa Lucy M mujur narit ati dua iku penanyi veteran melaki bini ti mega artis TV10 Production, Sijah enggau laki iya Peter Aaron.

Seduai chukup tekait sereta temegah ati meda penau iya ba pengawa belagu sereta ngerandang jalai ngagai Lucy M ba dunya pemerindang industri muzik Dayak.

“Berengkah ari nya meh aku lalu ditanya TV10 Production nyadi siku penanyi ba baruh perabung sida.

“Nyangka udah selatan ba pengawa merindang lalu ba taun 2008, aku mujur ngerikod lagu single keterubah diri ti diberi nama Semina Tinggal Pengingat.

“Taja pia, sebedau ngerikod lagu tu, aku endang suah dikangau merindang ba bemacham pengerami tauka program berengkah ari taun 1996 nyentuk 2007,” tusui Lucy M.

Ungkup penerang, naka diatu, Lucy M mujur ngerikod enggau ngeluarka lebih 70 buah lagu nyengkaum enam iti album, siti album single lalu lagu single pemadu baru iya nya Enggai Tundi Dek.

Sekeda lagu ti mujur ngangkat nama Lucy M ba dunya pemerindang Dayak baka -Dendam Enda Padam_, Buya Bepangan, Anak Bujang Aya, Kelalu Laun, Merap Bulan, Ambai Bujang Engkala enggau ti bukai.

PAIT MANIS MERINDANG
Seagi-agi kitai idup ba dunya injau tu, kitai sigi enda ulih lari ari bemacham penguji ti seruran datai nuntung.

Genap pengawa dikereja kitai sigi bisi ngembuan penguji kediri empu lalu kitai patut liat ati sereta pintar napi semua penguji nya.

Pia mega, ba dunya pemerindang, baka bala penanyi bukai, Lucy M bela ngasaika bemacham penguji ti mai seribu kenang pait enggau manis.

Nyerita senentang peneleba ti kala diasai iya, Lucy M madahka diri kala enda dibayar maya dikangau merindang.

“Sekumbang tepejuh ba dunya pemerindang tu bemacham penelaba ti kala diasaika aku nyengkaum enda dibayar maya dikangau merindang.

“Kala mega aku semina dibayar ngena kuie aja ti nyadi ke tepa ketegal udah merindang.

“Taja pia, aku nadai ngemanaka pekara tu laban aku endang lurus ati deka merindang bala peminat diri.

“Peneleba bukai kala diasaika aku baka merau ba pengelama semilan jam dikena ngenataika diri ngagai palan ti ngagauka aku merindang ketegal bedau bisi jalai alun.

“Maya merau tu, aku ngasaika pengelelak bebatakka perau tang chukup rindu laban bebala mayuh.

“Siti peneleba ti seruran dikeingatka aku lalu ulih ngasuh aku tuchum lelengup kediri lebuh ngenang peneleba tu iya nya aku kala labuh ke dalam ai maya merau,” ku iya nusui sekeda peneleba diri seraya tuchum lelegup mulaika baru pengingat maya nya suba.

SUKUNG INDUSTRI MUZIK DAYAK
Lebuh dirandau senentang industri muzik Dayak, Lucy M madah, industri muzik Dayak kemaya hari tu majak maju enti dibanding sepuluh taun ti udah.

Iya madah, semua kitai bela meda ubah besai dalam industri muzik Dayak ti mujur ngeluarka mayuh bala artis biak bepenau sereta kreatif baka kulat ti tumbuh pengudah ujan.

Ukai naka nya aja, ku iya, diatu mayuh lagu Iban trending ba pelasar YouTube lalu dikerinduka semua orang nyengkaum ba luar Sarawak baka Sabah, Semenanjung Malaysia, Indoensia enggau Brunei.

“Tu sebengkah ubah ti manah lalu aku ngarap semua kitai begempung nyaguka industri muzik kitai Dayak ngambi majak maju nunda singkang industri muzik menua luar,” ku iya.

Penanyi bekulit burak nya ngarap nembiak rebak baru ti bepenau ba pengawa belagu bela ngerichahka agi industri muzik Dayak.

DEKA NGELUAR MAYUH LAGU BARU
Anak kedua ari lima diri menyadi nya ngarapka diri ulih beretan lama ba industri muzik Dayak sereta deka ngeluarka mayuh agi lagu baru dudi hari.

“Aku naka ulih ngaga pemadu manah maya merindang sereta bedanji deka ngeluar mayuh lagu baru.

“Tu dikena aku masa bala peminat ti seruran nyukung pejalai aku ba dunya pemerindang ari suba nyentuk diatu.

“Enti nadai sukung ari kita semua, sapa meh aku? Lalu pejalai aku ba dunya pemerindang pen enda panjai.

“Pia mega, enti nadai kita, nadai Lucy M ba industri muzik Dayak.

“Nya alai, ngena peluang berega tu, aku meri terima kasih ngagai semua peminat lalu terus ke meh sukung kita ngagai industri muzik kitai Dayak,” ku iya.

Iya mega beterima kasih ngagai sida sebilik, bala bakih enggau kaban belayan ti bela nyukung pejalai iya ba dunya pemerindang sereta seruran bisi maya senang enggau tusah.

Nyerumba pengerami Gawai ti ngansak sesemak, Lucy M ngena peluang tu, meri Selamat Ngintu Pengerami Gawai Dayak ngagai semua bansa Dayak ti ngintu pengerami nya kelebih agi ngagai bala peminat, sida sebilik, bala bakih enggau kaban belayan.

“Aku ngarap semua kitai majak beberekat, garu guru gerai nyamai, lantang senang nguan menua, bulih tuah, bulih limpah, bulih duit, bulih ringgit, bulih reta, bulih pengereja…ohhh haaa,” ku iya.