Lagu Mulan Baru disadaka Eagle Crown bepelasarka leka main Ramban Uti

Tiga dara bajik asal ari Miri enggau Bintulu ke ngelar diri Eagle Crown diatu udah ayan baru enggau sebengkah lagu baru ke diberi nama Mulan Baru.

Lagu-lagu disadaka Eagle Crown ngelama tu enti diperati chukup bebida ari penanyi bukai laban digaga bepelasarka leka main asal Iban baka Pelandai enggau leka Timang Kenyalang.

Pemadu baru, lagu Mulan Baru ti dikeluarka bulan March tu tadi digaga bepelasarka leka main asal ke dikumbai Ramban Uti.

Artis dibaruh TJKSB Production & Radiant Music Studio ke bepalan di Miri tu keterubah ngerikod lagu dikumbai AUTOPHOBIA iya nya siti lagu dalam jaku Melayu ba taun 2019.

Diatu Eagle Crown udah mujur ngerikod lima lagu iya nya Asa Belala, Enda Ngipak,Betengapka Nuan sereta Mulan Baru udah suah didinga mensia mayuh ba stesyen radio Iban.

RABAN EAGLE CROWN…(Ari kanan) Victory Umang, Dee Nang enggau Amel Tijan.

Kelimpah ngembuan sada nyawa ke lundai raban Eagle Crown mega landik betanda.

Lagu Mulan Baru kebendar endang lama udah deka duikeluar iya nya dalam bulan December taun nyin kemari. Taja pia tejanggal ketegal pengerekai igi penyakit Covid- 19, ku penulis leka lagu Mulan Baru Ensalih Achop Entu.

Kenu ku Ensalih leka lagu Eagle Crown mayuh besaruk enggau leka main asal Iban.

“Nya alai, arapka bala peninga lebih agi rebak baru ulih nyagam tuju reti lagu nya enggau engkeman. Pia mega lagu sida tu mayuh diselitka enggau mayuh leka jaku Iban ti chulin.

“Dudi hari ila aku deka nguji nengkebang lagu bepelasarka leka Renong, Pantun, Sanggai, Biau enggau Leka Pelian Manang,”ku Ensalih.

Kebuah pia, ku iya enti enda disadaka nengah lagu nyangka rebak baru enda ngelala leka main asal laban sida nyau terunda-runda laban leka lagu nitihka segang pemansang dunya kemaya hari.

“Nya alai,tu mih tuju kebendar aku mai ati berani nengkebang lagu bepelasarka leka main asal kitai Iban taja betapi enggau bemacham pemar,”ku iya.

Ungkup penemu, Eagle Crown ditumbuh ba taun 2018 enggau nama asal dikumbai DE’Qumang. Maya nya DE Qumang bisi diarika lima iku indu dara sebedau berumpang ‘ruang bilik’ nyadi tiga iku setegal dua bakih iya nyurut kediri berindik ari penanggul ke enda ulih diseliah.

ENSALIH ACHOP

Suara Sarawak