Lagu Petang disadaka Allesandro mengkang ba penuduk atas CSJ Ke-11

TEBILANG enggau lagu ke diberi nama Petang, siku penanyi lelaki ke agi biak majak angkat ba industri muzik Dayak di menua tu iya nya Allesandro Deroma tauka tampak agi dikangau Allesandro.

Anak kedua ari tiga iku diri menyadi tu madahka iya deka datai baru enggau lagu rumpas kedua iya nya lagu Timang Pengerindu.

Allesandro mega madahka iya deka mansutka muzik video lagu Petang kelimpah ari lagu rumpas nya.

Enti meda TVA Network Youtube Channel, lagu Petang disadaka Allesandro diatu udah dipeda lebih 2.7 juta enggau nerima 1,426 timbal ari bala peminat iya.

Leka lagu Petang tu ditengkebang iya empu begulai enggau Vanessa Lawrence sereta Rawing Sharris Jawa lalu tiun iya ditengkebang Hairee Francis.

Nambahka nya, Allesandro rikoding lagu Petang tu ba Francis Five Studio Production enggau dikeluarka Platinum World Network Sdn Bhd.

MAYUH PENELEBA… Allesandro ngembuan mayuh peneleba laban berengkah merindang maya agi sekula sekondari suba.

LAGU TEBILANG

“Enda nyangka lagu Petang tu dipeda mayuh orang, reti iya lagu tu chukup dikerindu bala peminat.

“Terima kasih ke sukung bala kita ti rinduka lagu aku, naka ulih mih tudah diri udah tu mansutka lagu bukai ungkup bala peminat semua.

“Terima kasih mega nuju bala peminat ti udah nganjung lagu peminta ba radio sereta ngundi lagu aku ngujungka lagu Petang nya bulih lumur satu ba Tusun Sapa Juara Wai FM Tusun Ke-11/2021.

“Aku mega nerima manah timbal ari bala kita sekalika nya positif tauka negatif.

“Timbal diberi kita nya beguna amat meransang aku mansutka lagu bukai udah tu ke lebih manah sereta dikerindu semua kita,” ku Allesandro lebuh dirandau pemberita Suara Sarawak, ditu kemari.

LAGU TEBILANG… Lagu Petang diatu udah dipeda lebih 2.7 juta dalam Youtube enggau mujur bulih lumur satu ba Carta Sapa Juara Tusun Ke-11/2021.

Enti macha timbal ari bala peminat dalam lagu Petang, bisi sekeda madahka lagu Iban baka tu majak angkat sereta tiun iya nitihka gaya pemansang enggau muzik dikerindu rebak baru.

Bisi mega ngasaika lagu tu bisi kaul enggau pengidup tauka pekara ke udah nyadi ngagai siku-siku mensia.

Pia mega, bisi peminat madahka lagu Petang tu entara lagu dikerindu ba taun 2020 kelimpah ari lagu Tua Ditemu Petara disadaka Ramles Walter enggau lagu Gidan disadaka Rawing Sharris Jawa.

Sama mega enggau lagu Redak Seribu disadaka Raban Masterpiece enggau Sada Aku disadaka Michhie.

Ukai nya aja, bisi sekeda bala peminat minta lagu Petang tu bisi muzik video iya empu laban naka diatu, semina bisi official lyric video aja.

Bisi mega timbal dalam Youtube nya madahka lagu Petang disadaka Allesandro nya nyau baka cherita pengerindu sida.

Dalam 1, 426 timbal nya, pupu bansa orang ti meri timbal dataika bala peminat iya ba Indonesia mega bisi mantaika penemu bekaul lagu tu.

Allesandro madahka bala peminat anang irau ati, laban enda lama agi, iya deka mansutka muzik video lagu Petang tu sereta mansutka single kedua iya nya lagu Timang Pengerindu.

MAJAK ANGKAT… Udah ngebung dalam industri muzik pengelama enam taun, nama Allesandro majak angkat sebaka enggau penanyi baru ke diatu.

RINDU BELAGU KENYAU ARI POM TIGA

Ku Allesandro, iya rinduka pengawa belagu tu endang kenyau ari sekula suba.

“Aku endang rindu belagu kenyau ari agi sekula suba ke alai aku berengkah belagu maya Pom Tiga.

“Bai ati rindu belagu enggau merindang ba mua bala mayuh, aku suah enggau talent show.

“Udah nya, aku majk minatka pengawa belagu ngujungka aku berengkah nengkebang leka enggau tiun lagu.

“Nyau ke lama, aku numbuhka siti raban dikumbai Alleria Band maya agi sekula sekondari lalu kami seraban berengkah rekoding lagu.

“Ari nya tadi, kami sekaban masuk dalam industri muzik Iban nyentuk abis Pom Lima.

“Pengudah numbuhka Alleria Band nya, kami berengkah merindang ba café, Rumah Asap enggau ke bukai ti dekaka kami sekaban merindang,” ku Allesandro nerang silik pasal terubah iya nyingkang dalam industri muzik Iban tu.

Berebak enggau nya ku Allesandro, peneleba merindang kenyau agi sekula suba udah meransang iya belubah nitihka singkang bala penanyi bukai.

Iya mega madahka pemujur iya diatu berindik ari pengeliat ati ngemansangka diri sereta naka ulih mansutka lagu dikerindu bala peminat ngambi lagu iya tebilang ba menua tu.

Allesandro madahka iya enggau Alleria Band pengelama tiga taun enggau mujur mansutka dua buah lagu rumpas iya nya lagu Naka Tu Aja enggau Sayau.

Entara bala dalam Alleria Band tu iya nya Allesandro empu (Lead Guitarist), Ayum (Vocalist), Ray (Bassist), Xavier (Keyboardist) enggau Mac (Drummer).

Enti kitai meda ba ALLERIA OFFICIAL YoutubeChannel, lagu Naka Tu Aja udah dipeda lebih 297,000 ti dipansut dalam taun 2015.

Nangkan nya, single kedua iya nya lagu Sayau mega udah dipeda lebih 138,000 lalu lag utu dipansut dalam taun 2016.

Taja udah mansutka single solo mai lagu Petang, Allesandro mega bisi band dikumbai TVA Band lalu band nya ditumbuh kenyau ari taun 2017 nyentuk diatu.

Ku Allesandro, sida sekaban udah mansutka lima lagu rumpas kenyau ari band nya ditumbuh dalam TVA Network Youtube Channel.

“Ba TVA Band, kami sekaban bisi mansutka lima lagu single baka Sada Pengerindu dipansut dalam taun 2016 lalu lagu nya udah dipeda lebih 369,000.

“Lagu rumpas kedua dikumbai Ngenang Nuan udah dipansut dalam taun 2017 lalu udah dipeda lebih 210,000 sereta bisi mega disada ngena rentak Acoustic.

“Lagu Ayas udah dipansut dalam taun 2018 enggau udah dipeda lebih 12,000 lalu lagu Anchur udah dipeda lebih 45,000 lalu dipansut dalam taun 2019.

“Lagu rumpas kelima nya lagu Apus ti dipansut ba TVA Network Youtube Channel dalam taun 2020 sereta udah dipeda lebih 17,000,” ku Allesandro nerang silik seraya iya madahka udah enam taun ngaul diri dalam industri muzik Iban tu.

Kelimpah ari nya, Allesandro mega madahka semua leka enggau tiun lagu nya ditengkebang iya empu lalu lagu Petang aja lagu solo iya sereta ditengkebang tiga iku penengkebang lagu nyengkaum iya empu.

DIKERINDU BALA PEMINAT… Allesandro majak dikerindu bala peminat pengudah nyadaka lagu Petang.

BEREKAT PERANSANG APAI INDAI

Lebuh ditanya pasal kenang manis sekumbang ngebung dalam industri pemerindang tu, Allesandro madahka kenang manis diasaika iya nya lebuh rikoding genap lagu.

Kebuah pia laban iya naka ulih nyadaka lagu nya lalu ngarapka lagu disadaka iya ngelama tu ulih diterima sereta ulih merindang ati bala peminat.

“Bekaul sapa ti nyadi peransang aku, udah tentu bala apai enggau indai sereta bala menyadi.

“Berekat apai indai beguna amat lalu aku berasai lantang ati laban sida endang nyukung pejalai aku berengkah ari terubah iya masuk dalam industri muzik Iban tu.

“Pia mega, sukung ari bala penanyi bukai ti seruran meri penemu enggau timbal pasal lagu disadaka aku.

“Idola tauka orang ke nyadi peransang aku dalam industri muzik tu iya nya siku penanyi tebilang Indonesia, Ariel Noah laban aku chukup rindu meda pejalai iya dalam industri muzik Indonesia.

“Sukung ari bala peminat mega beguna amat ngambi aku mengkang beretan lalu majak angkat ari sukung sida.

“Enti nadai bala peminat, nyangka enda aku ulih datai ba tikas ke diatu baka lagu Petang nya, sida mih ngasuh aku angkat nengah lagu disadaka aku tu,” ku Allesandro nutup randau enggau Suara Sarawak.

Suara Sarawak