NAMA penanyi Ramles Walter majak tebilang laban lagu iya majak dikelala tauka kemaya hari dikumbai ‘trending’
Genap lagu dikeluar iya endang tebilang belama lalu baka selama, Ramles bisi nyendiaka lagu baru kelebih agi maya Gawai ungkup bala peminat sereta mensia mayuh.
Lagu Richah Gawai majak ‘trending’ lalu udah dipeda lebih 750,000 taja baru lapan hari ba Youtube Channel Maxis enggau Ramles Walter.
Ukai semina nya aja, lagu Richah Gawai nya majak dipeda mensia mayuh lalu udah bulih #2 on Trending for music.
Lebih manis, lagu Gawai ari Ramles sekali tu bekerejasama enggau Maxis.
Lagu Gawai Ramles tu mega deka merindang kitai Dayak ke deka ngintu Gawai berapa hari da agi.
Lebuh dirandau, Ramles madahka diri berasai gaga enggau temegah ati laban bisi raban bekaul deka bekerejasama enggau iya.
“Asai tekenyit enggau gaga lebuh raban Maxis ngerandau lalu madah pengingin ati deka bekerejasama mansutka lagu Gawai tu.
“Puji Tuhan, semua pengawa lanchar lalu lagu Gawai nyau ‘trending’.
“Tinggal dua hari da kitai deka ngintu hari besai, Pengerami Gawak Dayak 2023.
“Nyangka semua kitai udah nyikap diri ngintu hari besai kitai Dayak tu lalu bisi sekeda udah pulai ke menua.
“Terima kasih ke sukung semua kita ngelama tu. Terima meh lagu Gawai ari aku ungkup taun tu.
“Ngena peluang tu mega, aku meri Selamat Ngintu Gawai Dayak 2023 nuju semua!” ku Ramles.
