Lagu ‘Sepiak Nuan Ukai Aku’ mai Gagung Kirai dikelala peminat

INFO

Naka tu, lagu Sepiak Nuan Ukai Aku udah dipeda lebih ari 1.3 juta ba Yotube enggau lebih ari 4,000 kali ‘subscribe’ ba Youtube Gagung Kirai Official.

NAMA pekara tumu dikerunding mensia mayuh lebih agi rebak baru lebuh ninga nama Gagung Kirai tu? Nama Gagung Kirai diambi ari bansa ngepan asal Iban ti digaga ari kulit jelu enggau tan lama lalu leka jaku Kirai tu mai reti pengawa ngirai

Pia mega, ngepan Gagung nya silik amat lebuh digaga ngambi tan lama sereta ulih dikena rebak dudi. Gagung tu mega ngembuan penyelai enggau keranjai jari ti alus lebuh nempa ngepan nya.

Dulu menya, bala bujang berani ngerasuk gagung lebuh nurun ngayan maya menua agi siga ngujungka gagung tu tau dikumbai kitai dinding bulu.

MERINDANG… Gagung Kirai merindang bala peminat ba sebengkah pengerami ke bisi diatur ba Kuching.

Ku Fabrizio Biai ti mega ketuai raban Gagung Kirai, raban tu endang tulen anak Sarawak lalu ditumbuh dalam taun 2013.

“Lagu ti diasilka raban kami udah dipendingka bala peminta lagu Iban diatu kenyau ari taun 2015,” ku iya.
Kena bulan September 2015, Gagung Kirai majak dikerindu bala peminat lebuh ngeluarka single keterubah sida iya nya Lagu Sepiak Nuan Ukai Aku.

“Lagu ‘Sepiak Nuan Ukai Aku’ tu ulih dipendingka bala peninga ba radio lagu Iban baka Wai FM, Cat’s FM enggau ke bukai.

Naka tu, lagu Sepiak Nuan Ukai Aku udah dipeda lebih ari 1.3 juta ba Yotube enggau lebih ari 4,000 kali ‘subscribe’ ba Youtube Gagung Kirai Official.

Nambahka nya ku Fabrizio, Gagung Kirai mai genre lagu ‘heavy rock’ enggau ‘pop rock’ moden lalu single Sepiak Nuan Ukai Aku tu ngayanka identiti muzik sida.

ARAP TERUS MUJUR… Gagung Kirai meri terima kasih ke sukung semua peminat laban udah nerima enggau mendingka single keterubah enggau kedua sida.

Tebal agi, peminat rinduka leka enggau tiun lagu sida tu ke alai leka lagu ditengkebang Manggah Bunyau enggau Komposer iya, Nash TR.

Bisi mega bala peminat madahka leka lagu tu ngembuan reti kediri empu sereta madahka leka enggau tiun lagu tu mandangka industri muzik Iban bisi berubah nitihka gaya moden diatu.

Genre muzik lagu tu mega mengkang dikerindu bala nembiak kelimpah suah ditebah ba radio Iban.

Ngelansa pasal pejalai muzik sida naka diatu, Fabrizio madahka raban Gagung Kirai kala dipilih dataika semi finalis Anugerah Charta Sapa Juara (ACSJ) ke-4 di Kapit kena 19 Ogos 2017 enggau lagu single lagu keterubah iya nya Sepiak Nuan Ukai Aku.

“Tu entara taun pemadu nyulut ti kala diasaika kami pengudah mujur bulih Anugerah Lagu Iban Pemadu Tebilang ba Anugerah Muzik Sarawak (AMS) ba taun 2017,” terang iya.

Gagung Kirai diarika enam iku nembiak ti diketuai Fabrizio Biai iya nya pemain bass beumur 23 taun enggau raban iya ke bukai iya nya Erickson Tugang (Penanyi) 30 taun, Roezario Jimbun (Gitar Kesatu) 21 taun, Gibson Dagat (Gitar Kedua) 24 taun, Raikkonen Ricko (Penebah Drum) 16 taun enggau (Pemain Keyboard), Nathaniel Russell Philip beumur 30 taun.

Empat taun ti udah pengudah ngeluarka single keterubah sida, Gagung Kirai diatu ngarapka sida ulih ngangkatka nama baru lebuh datai baru enggau single kedua dikumbai Janji Endang Rumbau Aja (J.E.R.A).

Fabrizio madahka, lagu Janji Endang Rumbau Aja (J.E.R.A) mai reti semaya rumbau ngapa ngujungka sida ti asa ketegal pengerindu deka nesal belama iya ketegal pengerindu puntan di tengah jalai.

Ketegal balat asa, dia iya enggai agi labuh pengerindu laban semaya iya enggau indu dikesayau udah balang sereta nangika bekau lama nyadi baru.

Terang iya, video klip lagu tu nusui pasal siku lelaki ditipu siku indu ti dikesayau iya nyentuk indu nya sanggup begulai madu pengerindu enggau orang bukai taja seduai agi bepangan.

Ba pengujung cherita, indu nya ditemu pangan iya empu lebuh begulai enggau indu bukai lalu pekara ti nyadi balat ngasuh lelaki nya nesal laban bebendar ngiga jereki enggau chara ngambi ulih nirika meligai enggau indu nya enda nyadi nyata.

“Video klip nya mega mandangka ulah indu nya enda ngenang pemanah enggau pengeran lelaki nya lebuh seduai agi madu pengerindu,” terang iya sentang jalai cherita nya.

Nangkan nya, lagu tu mega deka nusui jalai cherita seduai agi begulai enggau pengudah indu nya bulaka semaya diri.

Lelaki nya enggai nerima indu nya ba pengidup iya agi laban balat asa sereta nesal udah beambis ati sayauka pangan iya taja bendar ngumbuk madahka diri deka pulai baru ngagai lelaki nya.

Tang, lelaki nya semina deka pangan iya ke dulu suba nyadi bakih aja lalu ngampunka semua penyalah ti kala dikereja iya sekumbang begulai suba.

Berebak enggau nya, sida ngaga video lagu J.E.R.A tu di Dewan Rumah Dayak SDNU, Saratok aja.

“Muzik video tu nadai begunaka endur bukai laban jalai cherita tu fokus mandangka cherita nitihka kreativiti diri empu.

“Kami mega ngurangka endur ngaga muzik video tu laban ti suntuk belanja,” terang Fabrizio.

Kelimpah ari nya, Fabrizio berasai lantang laban muzik video tu diterima bala peminat sereta lanchar dipejalai.
Iya mega beterima kasih ngagai Sydney Atin, siku peranak asal Saratok ti nyadi videographer laban udah bekerejasama ngemujurka pengawa ngaga muzik video lagu Janji Endang Rumbau Aja (J.E.R.A).

Leka lagu janji Endang Rumbau Aja tu mega ditengkebang Manggah Bunyau enggau tiun digaga raban Gagung Kirai empu.

Enggau tu mega aku meri terima kasih ngagai sida ke sama ngemujurka video klip tu iya nya Seventh Tribe Studio Recording Studio, Syahrizan Ramlee, bala crew ba muzik video iya nya Teresa Shaleyna, Carlos Christopher, Rionaldo, Railyson Dampa, Andrew, Wilkin Rantau, Pacin, Tinialishel Laie, Adriana Biah, Danson Geramong, Wilfred, Broneyfresh, Ritty, Bettysha, Dynas, Patricia, Jenang, Roma enggau Hillary.

Meri besai terima kasih ngagai piak ti udah bekerejasama ngemujurka endur ngaga muzik video lagu tu iya nya SDNU Roban, SDNU Saratok, SK Mendas Saratok, Meg’s Bistro Saratok, Achin Cafe Saratok, A&A Family Cafe Saratok, Rumah Asap SDNU Saratok, Tinggom Jelimin, Patrick Philip Moss, Marvelys M. Dian , Kennedy Lichon, Assom Lutek, Desmond Luta, Alexius Alex enggau Philemon Kana.

Video klip lagu Janji Endang Rumbau Aja (J.E.R.A) dikeluarka ba YouTube kena bulan Oktober 2018 enggau diatu udah dipeda lebih ari 25 ribu dalam kandang setaun.

Nya alai, Gagung Kirai ngarapka sida nampung pengawa nengkebang lagu ngambi ulih ngangkatka industri muzik Iban dudi hari.

Bala peminat ti deka nemu pekara pemadu baru ari Gagung Kirai, tau ngelawa Facebook- Gagung Kirai enggau Instagram – Gagung_Kirai.

Ba pengujung randau, raban Gagung Kirai meri terima kasih ke sukung semua peminta sida lalu sida madah, enti nadai kita nadai mih kami.

Nya alai, sukung mih industri muzik kitai Iban ngambi ulih nyingkang sebaka enggau muzik bukai sereta nitihka peminta bala peminat semua.

Suara Sarawak