SITI agi kelai menua baru didiri ba Miri ti mandangka polisi inklusif Kepala Menteri Sarawak, Datuk Patinggi Tan Sri Abang Johari Tun Openg ngagai semua bansa di Sarawak.

Pengawa nirika Palan Main Asal Orang Ulu enggau Indu Opis Gerempung Serakup Orang Ulu Sarawak Malaysia (Forum) beungkus RM25 juta nyadi kelai baru di Miri.

Abang Johari madah, projek ngaga begunan nya kebendar nyadi siti ari resolusyen tauka simpul jurai ba seminar main asal diatur dulu ari nya.

“Ba simpul jurai sehari nya, bisi serakup ti ngarika Orang Ulu di Sarawak dekaka sebuah palan ti ulih endur sida begelumu enggau besilih penemu ba pengawa ngemansangka komuniti sida.

“Lebuh aku berati enggau lenak ba peminta sida ti deka bisi begunan diri empu, ngambi bisi endur ngatur randau enggau ngiga akal napi ubah pemansang jeman baru diatu.

“Nya alai aku ngasaika peminta sida tu endang patut diperunding lalu ditangkup, kitai meretika penyelai adat kelimpah ulih nyadi reta menua kitai,” ku iya.

Abang Johari madah baru, begunan nya nyadi tanda Orang Ulu ti keran ngetanka budaya enggau main asal sereta pemujur komuniti asal nya dudi hari.

“Genap raban bansa bebasaka penyelai adat pangan diri lalu tu meh pengelebih enggau negapka kaul serakup pupu bansa ti nguan menua tu,” ku iya.