Langkau berega RM262,547.86 dirampas Kastam

SIBU: Opis Kastam Diraja Malaysia (JKDM) Sibu ngerampas 964 liter langkau ke dipelaba nyema dichukai manggai rega RM262,547.86 ba pengawa datai ngenyit ngagai sebuah kilang dibuka nadai belisin di Jalai Ulu Durin ditu lemai Hari Tiga tu tadi.

Direktor JKDM Nengeri Sarawak Dato Sharifah Halimah Tuanku Taha ba penerang iya sehari tu madah, bela dirampas iya nya tuak penyampau 35,700 liter, perengka enggau kereban bukai dikena ngaga ai biasa baka tong besi, dapur gas, periuk, gula pasir, gula apong, chiping enggau ke bukai.

Kenu ku iya, raban Unit Operasyen Darat enggau Unit Marin, Pampang Penerit Adat sereta sereta Unit Industri JKDM Sibu udah datai nyengit lalu meresa belakang sebuah rumah ba Jalai Hulu Durin urung pukul 1.30 lemai.

“Asil penerang enggau pansik JKDM Sibu tetemuka sebuah kilang ngaga langkau dipelaba nadai.

“Barang kes dirampas lalu dibai ngagai Opis Penerit Adat JKDM Sibu ngambika dipansik silik. Siku peranak menua tu ke dipelaba ngereja penyalah nya udah ditan nengah Akta Eksais 1976,” ku iya.

Berebak enggau nya, Sharifah Halimah mega nesau mensia mayuh meri kerejasama bekaul enggau pengawa tagang baka nginsap, ngirup ai bisa, merechun, dadah tauka senapang nuju lumur Kastam 1-800-88-8855, tauka ngelawa sebarang opis kastam ke besemak.

“Piak JKDM meri jamin ngelalaika nama orang ke meri penerang,” ku iya.

Suara Sarawak