Lantang seput pengudah 16 taun nganti

Projek Klinik Pengerai Siburan

SIBURAN: Projek Klinik Pengerai baru beungkus RM28.7 juta diatu nyadi nyata pengudah 16 taun peranak kandang ngelingi Siburan nganti.

Sapit Menteri Pengerai Dr Lee Boon Chye madahka pengawa ngaga Klinik Pengerai Siburan ke baru tu nyilih klinik pengerai ke lama.

Ku iya, klinik pengerai ke diatu sekut amat lalu endur paking kerita mega enda chukup ungkup bala staf, ambulan enggau mensia mayuh.

Kenu ku iya, Opis Pengerai Nengeri (JKN) nyeleti struktur begunan ke bisi diatu dikena nangkup peminta servis pengerai laban penyampau tubuh pesakit manggai 285 iku sehari.

NGAMATKA SEMAYA… Dr. Lee Boon Chye (tengah) disempulang Willie Monggin (kanan) enggau Dr. Michael Teo (kiba) ngabas taba Projek Klinik Pengerai Siburan lebuh pengawa nasih tanah projek nya tadi. Gambar – NADIM BOKHARI

Ku Boon Chye, tuju Projek Klinik Pengerai (Teja CR) enggau kuaters dikena ngangkatka tikas servis pengerai primer enggau ruang bilik peranak diau ngelingi Siburan seriris enggau KRA menua iya nya ngemanah infrastruktur pemun dalam komuniti mengeri.

Pia mega ku iya, projek tu mungkur sebuah blok Klinik Pengerai (Teja CR), sebuah blok Kuaters flat Kelas G (18 unit Kuaters), sebuah blok Kuater semi-D (dua unit Kuaters) ditimpuh tembu Disember 2021.

“Projek ngangkatka servis enggau penyikap perengka guna pengerai ungkup peranak menua pesisir seriris enggau pekara pengerai sereta igi penyakit ti nyadi jeman diatu.

“Kitai arap tikas pengerai enggau pengelantang bala pesakit ti nerima perebut mega ulih manah agi pengudah projek tu tembu,” ku iya.

Iya mansutka jaku nya lebuh pengawa nasih tanah taba Projek Klinik Pengerai (Teja CR) enggau Kuaters Siburan tadi.

Pia mega ku Boon Chye, klinik baru tu ila ulih nangkup peminta 500 pesakit sehari.

Ku iya, projek ngaga klinik pengerai ungkup kandang mengeri baka Tabuan Jaya, Serian enggau Daro sereta semilan klinik menua pesisir deka berengkah taun tu.

Boon Chye mega madahka projek ngaga sepital baka di Petrajaya enggau Sri Aman deka ditampung taun tu lalu sebuah sepital di Lawas mega deka didiri.

“Sebuah blok begunan di Sepital Miri deka digaga enggau sebuah blok begunan sepital di Bintulu ti udah tembu deka ngepunka operasyen enda lama agi,” ku iya.

Sama datai Direktor Pengerai Nengeri Datuk Jamilah Hashim, Kaban Parlimen Puncak Borneo Willie Monggin enggau Kaban Parlimen Miri Dr. Michael Teo Yu Keng sereta bala bukai.