MIRI: Lapan ruang bilik ba sitak Pujut ari bemacham etnik bulih pemaik ari Projek Nyeleti Rumah Seranta Sarawak (PPRMS).
ADUN Pujut, Adam Yii Siew Sang madahka juluk diri deka nempa gaya rumah ti likun enggau lantang ngagai peranak dia.
“Projek tu dikena mantu raban ti nadai penatai pemisi nyeleti rumah sida sekali ke nya napi penanggul perabung pesuk tauka bilik agu rusak.
“Pekara tu ulih mantu munaska pengirau sida bekaul perabung pesuk tauka lantai runtuh,” ku iya rambau penemuai ngabas rumah ruang bilik ti nerima bantu nya.
Penemuai nya meri peluang ngagai sida meresa pengerembai pengawa nyeleti enggau mendingka timbal peranak lokal dia berebak ari pengawa nyeleti rumah sida.
Pia mega, iya bela ngemataka pengawa nyuaka rasmi rumah ti udah tembu diseleti ari pengari kunteriktor ngagai peranak dia.
Iya madahka diri tepantup ati meda pengerambai projek nya sereta meransang raban sida chakah agi bejalaika pengawa mantu sida ti patut begunaka bantu.
Ba timpuh setaun, lebih 50 ruang bilik bulih pemaik ari program nya lalu lebih 100 peranak dia ngasaika pemaik nya.
Ku iya, raban sida naka ulih ngemujurka program nya dikena mantu mayuh agi sida ti patut nerima bantu.
Peranak Pujut nyengkaum kaban belayan, bala bakih tauka sida ti diau ba genturung pendiau dia ti begunaka bantu diperansang ngulihka penerang ari Palan Servis Parti Sa’ati Rayat Sarawak (SUPP) Pujut ti bepalan ba Palan Komersial Piasau.
Sida mega diperansang betelefon terus ngagai lumur 019-8863819 ninting Hari Satu nyentuk Hari Lima, pukul 8 pagi nyentuk 12.30 tengah hari enggau pukul 2 nyentuk 5 lemai lalu Hari Enam pukul 8 pagi nyentuk 12 tengah hari.
Sama datai, Tuai Nembiak Parti Sa’ati Rayat Sarawak (SUPP), Kelvin Hii Shin Yang sereta bala kunteriktor bekaul.
