Larissa ‘kumang menua’

KUCHING: Nama Larissa Ping Liew, 20 taun, tampak bebendang pengudah menggi gelar Miss World Malaysia 2018 ngalahka 11 pemekit bukai.

Miss World Malaysia 2018 mujur ngangkatka nama Larissa Ping Liew kelimpah ngangkatka nama Malaysia ba Pekit Kumang Dunya nya.

Betambah manis, Larissa bulih Anugerah Kumang Fotogenik enggau Anugerah Top Talent berambaika jaku Beauty With A Purpose.

Larissa ada lalu ngentapka pendiau diri ba Kuching. Apai iya China lalu Indai iya Kenyah ari Long Julan lalu iya belajar ba Sekula Sekondari (SMK) St Joseph, Kuching.

“Indai suah ngajar aku ngambika ngetan adat enggau main asal bansa kitai lalu ari nya, aku enggau menyadi aku belajar tanda bansa Kenyah sereta nebah Sape.

KUMANG MENUA… Lariisa menggi gelar Champion Miss World Malaysia 2018 lebuh pekit nya diatur ba Palan Aum Borneo Kuching (BCCK) taun 2018.

Udah nya, iya mujur nembuka pelajar diploma seni ba HELP University enggau dipelanja 100 peratus penyampau RM20,000 ari Anugerah Sekularship Sekula (SASA) dalam taun 2018.

Pemujur Larissa nyadi Miss World Malaysia ukai naka nya aja laban sebedau tu iya kala nyerete Pekit Kumang Keligit Orang Ulu 2018 Bagi Menua Miri lalu nyadi champion pekit nya beserimbai enggau hari besai Gawai Dayak.

Larrisa udah ngarika Malaysia ngagai Sanya, China enggau 117 pemekit datai ari menua bukai kena 8 Disember 2018 bepekit Miss World 2018 enggau penyereta bukai ba serata dunya tu pengelama sebulan.

Pejalai iya ngarika Malaysia chukup ngemegah nama Malaysia pengudah mujur ba mayuh renggat pekit nya nyengkaum Top 5 for Best Designer Award, Top 32 for Miss World Top Model lalu mujur bepekit ungkup Miss World Talent.

“Miss World tu ngiga pemekit ti ngembuan personaliti enggau program diatur sida lebuh mantu komuniti,” terang Larissa.

PERANSANG NEMBIAK… Larissa nero sereta ngaga mural begulai enggau bala nembiak ba SK Long Seridan lebuh iya bejalaika Project ba sekula nya taun nyin kemari.

Taja enda nyingkang ngagai renggat kepenudi Miss World 2018, Larissa mujur mantaika pengelandik iya ukai semina bajik tang pintar bejaku enggau mantu komuniti Penan kelebih agi bala nembiak ba Long Seridan.

Kelimpah ngembuan gamal ti chukup bajik, iya mega ngembuan penyiru sereta chukup mentas ngagai bala anak mit enggau seruran ngiri penemu ngagai sida enggau ngenati nasip anak mit ba menua tu.

Larissa bisi juluk deka mantu anak mit ba kandang menua ulu kelebih agi dalam bidang pelajar laban iya pechaya, pemandai ulih ngangkatka kitai ngagai renggat ke tinggi agi enggau sama singkang baka orang bukai.

Nambahka nya, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah nyiri Larissa menggi pangku pengawa nyadi Duta Dagang Temuai Sarawak.

“Aku andalka pengerami tauka aktiviti baka tu ulih mantu ngangkatka nengeri Sarawak enggau dagang temuai menua ngagai tikas dunya,” ku Larissa.

NGETANKA MAIN ASAL… Sape ditebah Larissa rambau pekit Miss World mujur nerima perati ari bala akim enggau penyereta pekit nya.

Maya bejalaika Project Beauty With A Purpose, iya ngaul kerejasama ngemujur Indigenous Digital Outreach Programme enggau Sarawak Multimedia Authority (SMA) sereta The Champions Kuching ngagai Sekula Primari (SK) Long Seridan, Marudi, Sarawak dalam taun 2018.

“Kebuah aku milih Long Seridan bejalaika Project Beauty With A Purpose laban indai aku ada ba Baram lalu Long Seridan tu palan pemadu manah dilawa sereta tebal agi nembiak datai ari bansa Penan.

Iya mega nyereta Indigenous Digital Outreach Programme ngambi meri penerang ngagai bala nembiak pasal ngena teknologi digital ba sekula ngambi ulih meri peransang ngagai sida nampung pelajar ngagai renggat ke tinggi agi.

“Kami mega mai komputer ngagai SK Long Seridan ngambi ulih ngajar sida chara bekenaka komputer nitihka pemansang dunya diatu.

Pia mega ku iya, sida mega bisi ngatur mayuh aktiviti awakka meransang enggau ngingat pasal pemesai guna pelajar ba pengidup kitai.

ANGKUN… Larissa diatu chakah nyereta mayuh aktiviti ngetanka main asal baka mantaika main asal sida maya pengerami besai bisi diatur ba menua tu.

Aku berasai gaga lebuh meda sida nyinuk ngaga jumpang enggau jumpang tu nunjukka tanggungpengawa dilempai ngambi sida ulih mujur dalam pengidup jemah.

“Aktiviti tu mai besai reti awakka sida rindu nurun ke sekula enggau ulih nyapai juluk dikeingin sida lebuh udah besai ila,” ku iya ngelansa pengawa nya.

Ba projek nya, Larissa enggau bala bukai bisi ngatur aktiviti baka ngubah pendiau librari sekula nya baka ngeripih buku, nyeleti dik enggau aktiviti bukai.

Kelimpah ngabas sekula, kami mega bisi ngusung apai indai sida ari bansa Penan ke rumah enggau meda gaya pendiau endur sida diau.

Nambahka nya ku iya, sida sebuat bisi bejalai ngagai Long Seluan lalu bejalai penyauh 45 minit nengah kampung ba menua tu lalu jalai tu mega suah ditengah bala apai indai nembiak nganjung enggau ngambi anak sida pulai sekula.

“Ninting hari, nembiak Penan ba menua tu napi pemar ngulihka penemu laban sida nengah jalai kampung penyauh nyauka sejam enggau nengah sungai ketegal deka nurun ke sekula,” ku iya nusui pejalai nembiak nurun ke sekula.

“Aku berasai chukup temegah meda pengeransing bala nembiak nurun ke sekula taja napi pemar ngerenchah kampung enggau sungai ketegal deka ngiga pemandai ngambi nyadi orang ti menyana jemah kelimpah ngubah tikas idup sida sebilik,” ku iya.

Ba hari kepenudi sida sebuat ba Long Seridan, bala nembiak nanam paung kayu benama Ping enggau nengkebang lagu dikena ngingatka penatai Larissa ngusung bala nembiak kia.

“Meri bantu tu enda ngira maya enggau umur lalu kitai ngaul orang kelebih agi ngajar bala nembiak ti nadai peluang nurun ke sekula. Kitai patut nulung orang bukai ngambi sida ulih nyingkang baka orang bukai,” ku iya nerang.

Larissa pechaya, genap nembiak ngembuan pengelebih enggau pengelandik ngambi ulih ngemansangka diri ba menua tu.

Lebuh nyaut tanya dalam Head to Head Challenge, Larissa madah kitai patut mantu komuniti taja pekara nya mit aja enggau nyadi model ngagai rebak biak.

Ba pekit nya, iya ngasaika peneleba ulih betemu enggau penyereta bukai ba serata dunya tu lalu genap penyereta bisi tuju kediri empu baka mantu komuniti, sekula enggau bansa sida.

“Mayuh bansa bukai menua tu begunaka bantu kelimpah ari bansa Kenyah enggau Penan lalu aku deka penemu enggau sebana sida didinga ba selampur menua tu,” terang iya.

“Aku berasai nangi lebuh nyereta Miss World ba Sanya, China laban nangika diri tumu ditingkil ari kategori nya tang lebuh meda bala penyereta mai juluk kediri empu dikena mantu komuniti ba menua sida.

Nangkan nya ku Larissa, perambu iya udah nyereta pekit iya nya deka ngabas baru sekula nya laban iya endang bisi juluk ati deka nyadi pengajar enggau iya deka beratika ubah pengudah ngabas sekula nya suba.

“Enti semua perengkaguna ba sekula nya manah magang sereta bisi ubah, kami deka mindah ngagai sekula bukai ti begunaka bantu kami lalu bisi orang meri rintai sekula ti begunaka bantu kami.

Dalam taun 2019, Larissa kala mantaika tanda bansa Kenyah enggau iya nyadi siku ari raban Warisan Sape Telang Usan lebuh Rainforest World Music Festival (RWMF) 2019.

Diatu, Larissa nampung pelajar Degree in Law ba Universiti Malaysia (UM) laban iya beratka pelajar ngambi ulih mujur agi dudi hari.