Latih profesional ungkup OKU

KUCHING: Keretas kereja bekaul perambu numbuhka Palan Latih Orang Nyelai Pendiau (OKU) di Sarawak deka tembu taun tu.
Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka palan latih tu deka digaga ungkup ngemuntangka raban OKU nampung sekula pengudah tembu peresa Sijil Pelajaran Malaysia (SPM).
“Diatu Sarawak bedau bisi ngembuan sekula vokasional khas ungkup OKU lalu enti sida deka nampung sekula, sida mesti ngagai Semenanjung Malaysia belajar din.
“Pekara tu ngirauka ati apai indai laban anak-anak OKU sida ngejang jauh sereta mar dikemataka,” ku iya.
Fatimah bejaku munyi nya lebuh ditanya pemberita pengudah Program Nyukaka Geran Gerempung Volunteer Pengintu Pengelantang ngagai Gerempung Orang Buta Malaysia Pampang Sarawak di King Centre ditu, kemari.
Ku iya, taja pia perambu nya bedau ditentuka agi baikka ngaga sebuah kompleks latih OKU tauka sebuah sekula vokasional khas OKU.
“Kitai agi berandau sentang bansa kus latih ti deka disediaka ngagai raban OKU laban OKU mayuh bansa baka OKU buta, OKU bengal enggau penimpang ke bukai.
“Tang pelasar tu mesti disetujuka dulu sebedau perambu digaga.
“Pia mega, pejalai palan nya pan bedau ditemu agi baikka ngaga pilot projek nyuwa premis sebedau begunan baru digaga,” ku iya.
Fatimah madahka, iya andal agi enti palan latih tu ila digaga ba baruh kuasa Perintah Sarawak empu.
“Enti palan tu digaga nyadi sekula vokasional kitai mesti ngulihka pemendar ari Perintah Besai.
“Aku ngasaika nyamai agi palan tu digaga ba baruh Perintah Sarawak sebaka enggau Palan Latih Interventsyen Tumu (Oseic),” ku iya.
Iya sekali agi madahka, nengah palan tu ila raban OKU ulih ngulihka latih profesional sereta setipikit dikena ngulihka pengawa sereta bayar gaji ti patut.

Suara Sarawak