KUCHING: Lebih 2,000 saintis, pakar pengawa berubat, pemansik, pengubah polisi enggau raban bekuasa antarabansa datai ngulu Kongres Antarabansa Pengawa Berubat enggau Malaria (ICTMM) 2024 ti deka diatur kena 19 nyentuk 23 September taun baru.
Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal, Datuk Seri Dr. Sim Kui Hian madah, kongres nya ila deka diatur ba Palan Aum Borneo Kuching (BCCK).
“Kongres tu deka diatur serimbai enggau Gempuru Gerempung Parasitologi enggau Pengawa Berubat Tropika Malaysia Ke-60 sereta Kongres Pengawa Berubat Tropika enggau Parasitologi ASEAN Ke-10.
“Tu ngelaika Malaysia ulih nyadi tuai rumah ngatur sebengkah kongres tebilang dunya ungkup ubah tropika enggau malaria,” ku iya.
Kui Hian bejaku munyi nya rambau aum pemberita Aum Kongres Antarabansa Tropical Medicine enggau Malaria ba Malaysia di Palan Aum Borneo Kuching (BCCK) ditu kemari.
Iya mega meri tabi puji ngagai Malaysia laban mujur bulih penuduk nya asil kerejasama Gerempung Parasitologi enggau Pengawa Berubat Tropika Malaysia, Pengawa Dagang Sarawak (BESarawak) enggau Biro Aum enggau Pengawa Pemandang Malaysia (MyCEB).
Ngelansa silik bekaul kongres tu, Kui Hian madah, gaya tropika Sarawak ngembuan bemacham langkar rampa menua ti ulih numbuhka mayuh palan idup penyakit berampit ti tinggi.
Ku iya, ari kongres nya ila, raban bepenau tu deka berandau pejuluk pengawa berubat tropika baka penyakit malaria, penanggul dadah enggau zoonosis (penyakit enggau rampit ti ngerekai entara jelu ngagai mensia).
Kelimpah ari nya, Presiden Perintah Besai Pengawa berubat Tropika enggau Malaria Antarabansa Profesor Dr Malcolm Jones madah, iya keran milih Sarawak laban rampa menua ti nyelai endur bejalaika pansik malaria sereta penyakit tropika bukai ketegal ekosistem menua tu ti engkeman.
“Tanggungpengawa perintah besai endang ungkup nentuka semua rayat enggau komuniti saintifik, kelebih agi ba rantau Asia Pasifik seruran nerima penerang bekaul pemansang pengawa berubat tropika dunya,” ku iya.
Ungkup penerang mensia mayuh, rejister nyadi pengari kongres tu udah dibuka nengah bayar RM450 aja ungkup rayat Malaysia enggau AS$100 ungkup pengari menua luar. Penerang silik ulih ngelawa email secretariat@ictmm2024.org tauka meda reruai https://ictmm2024.org/.
