KUCHING: Pengawa ngintu Hari Malaysia 2023 Renggat Nasional ti ngena rambai jaku Segulai Sejalai nerima timbal manah lebuh lebih 3,000 iku rayat di menua tu ngerichah pengerami nya.
Nyadi sebuah wilayah ti numbuhka menua Malaysia, pengawa ngintu Hari Malaysia nya endang semak ba ati rayat Sarawak.
Pekara tu nyata dipeda lebuh Sarawak nyadi tuai rumah ngatur pengerami Hari Malaysia Renggat Nasional ketujuh ari 13 kali atur program nya ti berengkah dipejalai kenyau taun 2010 suba.
Intu pengerami tu richah enggau penatai mensia mayuh ari pupu bansa, jalai pengarap sereta serap umur ti bela gagit deka meda pengerami tu.
Baka nya mega enggau bemacham bansa pekayan adat enggau tradisional rayat ari pupu bansa bisi dipandang rambau pengerami nya, kelimpah rayat bela gaga mantaika tambai nengeri sida empu.
Intu pengerami tu mega dikena ngenang penumbuh menua Malaysia entara Tanah Melayu, Sabah enggau Sarawak ba taun 1963 kelia.
Program besai nya dipandang terus ba stesyen televisyen menua TV1 (RTM), stesyen televisyen menua Sarawak empu, TVS enggau ba atas tali arus baka ba ruai Facebook Opis Menteri Komunikesyen enggau Digital (KKD) sereta Merdeka360 berengkah pukul 8.30 malam.
Mayuh aktiviti manah bisi diatur nyengkaum pengawa betanda ari opis enggau ejensi perintah, gerempung ukai dikuasa perintah (NGO), pengawa ngitau tambai Malaysia enggau Macha Ikrar Rukun Negara.
Bala ti bisi datai mega diperindang penanyi tebilang menua baka Aina Abdul enggau Bob Yusof, kelimpah penanyi bukai baka Ricky Andrewson, Valerie Thiam, Claudia Geres, Mal Imran enggau Charlyn Dare.
