Lebih 8, 000 raban Kristian seati gagit nganti Hari Krimas

KUCHING: Gaya hari ujan lemai Hari Enam enda ngelemika semengat Krismas lebih 8,000 iku raban Kristian ari 15 kontinjen gerija ditu ngintu sereta nyendia diri nganti penatai Hari Krismas.

Pengawa Bebala Mayuh Ninting Taun Krismas Kuching ti diatur di Padang Jubilee Majlis Bandaraya Kuching Selatan (MBKS) ngemataka bala penyereta udah nyikap diri enggau payung, tupi sereta baju ujan berengkah ari pukul 5 lemai nyendiaka diri nempuh gaya hari ujan.

Sebedau pengawa bejalai nya berengkah, pengawa besembiang diiring oleh Roman Catholic Archdiocese of Kuching Archbishop Simon Poh enggau bala ketuai gerija ke bukai.

Pengawa bejalai nya mungkur pejalai enggau penyauh 4 kilometer ti mansa mayuh bengkah kelai sereta jalai alun ba palan mengeri tu.

Pengawa bejalai tu sekali agi diatur Gerempung Gerija-Gerija Sarawak (ACS) enggau Kuching Ministers’ Fellowship begulai enggau Methodist SCAC.

Kaban Parlimen Bandar Kuching Dr Kelvin Yii ti mega datai ngulu pengawa bejalai nya madahka pengawa ti nyelai baka tu nyadi siti chara semua raban gerija enda ngira penemu, umur enggau bansa begempuru lalu beserakup dalam siti ati. Bisi 15 bengkah gerija di selampur Kuching nitihka pengawa bejalai bebala mayuh nya nyengkaum Gereja Katolik, Gereja Anglikan, Gereja Methodist SCAC, Gereja Sidang Injil Borneo (SIB), Gereja Seventh-Day Adventist, The Salvation Army, Gereja Baptist Sarawak, Gerija Hope enggau ke bukai.