KUCHING: Penyandang Dun Mambong, Datuk Dr Jerip Susil mantaika ulu lungga penuduk Dun Mambong dipelaba deka bepadan lebih ari tiga chalun belaban maya Pengawa Bepilih Nengeri Ke-12 (PRN-12) kena 18 Disember tu.
Ku iya, chalun ari Parti Tindakan Demokratik (DAP), Parti Sarawak Bersatu (PSB), Parti Bumi Kenyalang (PBK) enggau engka chalun independent deka bediri ngerebut Dun Mambong nya.
Iya mega beratika pekara tu sebagi ari demokrasi lalu barang sapa ulih nyadi chalun ungkup penuduk Dun Mambong.
“Sigi amat. Makin mayuh makin richah, barang sapa ulih nguji lalu tebal agi genap chalun bisi bala iya empu.
“Manah agi sida ngulih laban tu ulih meri penyedar ngagai sida sentang nyadi pengari rayat ukai semina menang undi,” ku iya ba randau khas, ensanus.
Nambahka nya ku Jerip, menang penagwa bepilih ukai semina menang undi tang nama perambu pengari rayat udah nya dikena ngemansangka konstitusyen iya.
Terang iya, perambu pemansang nya mesti dilanggur manah ngambi pemansang nya sebengkah endur nya meri pemaik.
“Enti sema diberi agih belanja RM5 juta ungkup Program Transfomasyen Menua Pesisir (RTP), agih belanja nya mesti diperambu manah ngambi ba pengujung penggal, kitai ulih meda tuju nya mujur dijapai,” terang iya.
Nangkan nya ku iya, penyakal deka mantaika bemacham isu sekumbang kimpin PRN lalu entara isu suah dibantai iya nya isu bekaul Tanah Adat Bansa Asal (NCR), pemansang enggau isu ngambi pengereja dalam perintah.
“Sida mega mantaika isu bekaul bekal ai beresi ba Bi’Annah di media rama.
“Isu ti dibantai nya endang amat tang pekara tu benung diputar berenggat.
“Nya alai, rayat mesti meri sukung ngagai perintah dipegai Datuk Patinggi Tan Sri Abang Johari Tun Openg ngambi penanggul ti dibantai nya ulih diputar,” ku iya.
Ngelansa pasal PRN enda lama agi, Jerip madahka sida deka bebendar gawa kelebih agi lebuh mantaika lambang Gempung Parti Sarawak (GPS) ngagai bala pengundi.
“Pengundi chukup ngelala lambang dachin lalu kitai mesti nelebaka pengundi enggau lambang GPS, kitai nadai agi begulai enggau Barisan Nasional (BN) tang kitai diatu begulai enggau GPS.
“Nya entara pemar ditapi kami lalu kami deka bebendar agi ngemujurka pengawa tu,” terang Jerip.
Ba PRN Ke-11, Jerip menang penuduk Mambong enggau majoriti 3,333 lebuh besatup enggau tiga chalun ngalahka chalun DAP enggau PKR lebuh nya iya nya Sanjan Daik enggau Datuk Willie
Mongin.
