SIBU: Duit simpan siku pedagang sepenyampau RM324,201.05 lenyau pengudah kena tipu sindiket nipu beranakka puku.
Tuai Polis Pelilih Sibu, ACP Zulkipli Suhaili ba sebengkah penerang kemari madah, lelaki beumur urung 50 taun nya ditipu skim beranakka puku ti nyendia untung besai.
“Kena 20 March tu tadi, lelaki peranak menua tu ti gawa nyadi pegadang tekait ati meda skim beranakka puku ti nyendia untung besai 50 peratus ba Facebook.
“Lelaki kena tipu tu nganjung pesan nengah aplikasyen WhatsApp ngagai lumur ti dibantai ba skim tu lalu iya dipinta download aplikasyen DCMA Trading,” ku iya.
Zulkipli madah, kena 19 April enggau 12 Mei tu tadi, lelaki nya udah ngaga transaksyen bayar beranakka puku sepenyampau RM324,201.05 ba penyuah 11 kali ngagai tiga akaun bank menua tu.
“Lelaki tu irau ati sereta sedar diri udah kena tipu pengudah puntan ngeluarka untung ti diulih iya nengah skim tu lalu kangau telefon iya pen disekat,” ku iya.
Iya madah, lelaki kena tipu nya ngaga ripot polis ensanus lalu keretas pansik udah dibuka ba baruh Seksyen 420 Kanun Keseksaan.
Naka ripot nya digaga, ku iya, lelaki nya lalu nadai nerima sebarang untung baka ti udah disemaya sida.
