Lelaki Sepanyol bebadi nyawa labuh ari 4WD

KUCHING: Siku temuai lelaki bebadi nyawa pengudah labuh ari tanju sebuah kerita 4WD ba penusah bebadi nyadi ba Jalai FAC Matang urung pukul 4 lemai kemari.

Kenu ku Ketuai Opis Pansik enggau Penerit Adat Trafik Sarawak, Superintendan Alexson Naga Chabu, niang beumur 28, peranak menua Sepanyol nepan sebuah kerita 4WD begulai enggau tiga lelaki rayat menua tu.

Ku iya, penusah nyadi lebuh sida sebuat ba rantau jalai ari Kuching nuju Kampung Telaga Air.

“Lebuh datai ba Jalai FAC Matang, Francisco Javier Fernandez De Lascoiti Mateo ke duduk ba tanju 4WD nya begulai enggau siku agi bakih ke bukai tegelinchir lalu labuh ke jalai alun.

“Iya ti balat bakal ba pala lalu ditaban ke Sepital Pakar Normah Kuching ngambika diperubat.

“Niang ditukuka parai urung pukul 7.30 malam lalu bangkai iya udah nya dibai ngagai Sepital Besai Sarawak (SGH),” ku iya ba penerang tadi.

Alexson madahka piak Konsulat Sepanyol enggau sida niang sebilik udah dipadah pasal penusah nya lalu sida sebilik diatu dalam pejalai ke Kuching.

Iya madahka niang dipelaba datai ke Sarawak kena 9 September tu tadi.

Naka diatu, kes agi dipansik di baruh Seksyen 41(1) Akta Pengangkutan Jalan 1987.

BERITA SINU… Peranak Sepanyol bebadi nyawa ketegal labuh ari tanju kerita 4WD ti ditepan iya, kemari