Lemambang Nyambang meruan regas dikangau nimang

Ada kena 4 Februari 1934 ba Rumah Kayong Numpang Lubok Sengelang Ulu Sebetan,Lemambang Tebilang Nyambang anak Luing sigi tampak rita senentang pengawa Main Asal Adat bansa Iban.

Beumur 85 taun, diatu diau mendam ba Rumah Patrick Kudang Lengain Saratok, mengkang enda surut ari ngereja pengawa main asal Iban ke lebih agi sentang pengawa Nimang Jalung ba pelilih Saratok ti mega suah diambi orang nimang luar ari menua Saratok.

Sigi tebilang tampak rita,sereta ngembuan mayuh macham penemu enggau pengelandik ba senentang Adat Asal Iban sereta Jaku Main Iban baka Nimang Jalung, Mengap, Jaku Melah Pinang, Miau Pengabang enggau Miau Piring, Nyampi,Ngintu tauka Mela Burung, Atur pengawa Mudas, Macha Ati Jani sereta mega enggau sekeda penemu tauka adat asal Iban ti bukai.

Ketegal endang landik sereta ngembuan mayuh penemu, nya alai iya suah bendar diambi tauka diinjau orang nembuka pengawa lebuh orang bisi pengawa baka Gawai Antu, Mengap, Nikah enggau Mudas.

Diinjau orang kulu kili ukai semina ba pelilih Saratok aja tang suah mega diambi nembuka pengawa (Gawai) ba menua pelilih Betong.

LIAT ATI… Nyambang mengkang regas ngemeranka adat main asal bansa Iban.

“Keterubah iya aku enggau orang Nimang Jalung maya umur aku 17 taun ba Lubok Empit, Awik urung taun 60-an kelia.

“Bepun ari nya, main asal kitai iban lebih agi Nimang Jalung lalu semampai lekat ba batang tubuh aku sampai ke seharitu,”ku iya lebuh dirandau Suara Sarawak ba rumah iya di Lengain Saratok apin lama.

Mulai ngagai pun kenang, bepun ari taun 1976 nyentukka sehari tu Lemambang Nyambang udah Nimang Jalung maya Gawai Antu ba 32 buah rumah panjai pelilih Saratok enggau Betong.

Ngelansa pengingat maya Nimang begulai enggau niang apai iya (Lemambang Luing anak Anggun).

Sekeda menua ke kala alai seduai iya begulai Nimang Jalung iya nya ba menua Lubok Empit Awik, Nangga Dendang Wak Pakan, Beratong Roban, Sungai Kelampai Ulu Sebetan,Nyiar Roban, Serimbing Ulu Sebetan, Nangga Gerenjang Krian,Nangga Ulai Rimbas Debak, Sungai Engkabang Roban, Supok Seblak enggau menua Kerangan ba Krian.

Rumah panjai iya empu ba Lengain Sebetan Ili, mega mujur niri ke Gawai Antu urung taun 1975 ke mega, dua taun udah nya dalam taun 1977 Nyambang lalu dipadu ke sida serumah ngiring ngembing ngempung perabung nyadi Tuai Rumah kira pengelama tiga taun.

Rumah panjai orang niri Gawai Antu ke udah alai Lemambang Nyambang tu Nimang Jalung Matak Jalai begulai enggau siku agi Lemambang tebilang Anggat anak Chaong iya nya ba Rumah Penghulu Isa Engkudu Sebetan, Rh.

Umbol Lubok Sengelang Ulu Sebetan, Rh.Pelungga Atas Seblak, Rh. Mathew Demang Tembawai Pok, Rh. Wenston Jail Batu 4 Sebetan, Rh. Gelungan Kerupok Sebetan, Rh. Unggut Ulu Bayor Rimbas, Rh.Panjai Datin Seri Empiang Jabu ba Samu Paku Saribas, Rh.Penghulu Kadam Nangga Maras Krian, Rh.Cr. Rumpang Engkala Krian, Rh. Asul Tabau Krian, Rh Cr. Mujah Babang Pandak Krian, Rh. Sambang Babang Panjai Krian lalu endur kepenudi alai iya Nimang Jalung Matak Jalai iya ba Rh. Tali Melintang, Roban Seblak.

Lalu iya ka pemadu baru (2018) Lemambang Nyambang enggau raban iya bisi diambi Nimang Jalung ba Rumah panjai ex- Sapit Kepala Menteri Sarawak Datuk Patinggi Tan Sri Alfred Jabu Numpang ba Gensurai Layar Betong.

Ngelansa mimit kenang ba pengidup beruang bilik, Lemambang Nyambang mujur nirika ruang bilik enggau Endun Badong peranak asal ari Lengain,Sebetan Ili urung taun 1956.

Ari pemujur nirika rumah tangga dia seduai iya teulihka reta pemadu berega (anak) sembilan iku iya nya tujuh lelaki lalu dua iku indu sereta bisi mega 30 iku uchu lalu 14 iku ichit naka sehari tu.

Laban endang sigi ngembuan penemu enggau pengelandik ke lalu mega siku ari tuai Iban ti chakah senentang Adat Asal Iban, Main Asal enggau ngembuan pengelandik bejaku ngena leka main asal dia iya diberi perintah Sarawak Pingat Bintang Kebesaran ke di kumbai Bentara Bintang Sarawak (BBS) ari Tuai Pemesai Menua (TYT) Tun Datuk Patinggi Haji Abang Muhammad Sallahuddin kenaka 29 June 2002.

Suara Sarawak