ARTIKEL

LAILEENGO

Lemang digaga ari periuk kera nyamai, bebau rengut

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

PERIUK kera tauka nama saintifik iya Nepenthes Mirabilis majak dikerindu mensia mayuh lebuh sebansa utai tumbuh nya nyadi variasyen ba pemakai lokal kelebih agi lemang enggau asi lemak.

Pemakai ti digaga ari periuk kera tu ukai semina nerima mayuh peminta rambau musin pengerami tang bela nyadi pemakai ungkup bala temuai dipebasa ba sekeda program tauka pengerami.

Peminta mensia mayuh ngagai periuk kera ti bechura mirah enggau bepetik ba pengawa nyumai mayuh agi enti dibanding periuk kera bechura gadung.

TEMEGAH… Laileengo temegah mantaika lemang ti digaga iya empu ari periuk kera lalu dijual ba Pasar Serikin.

BEBAU RENGUT
Kebuah pia laban periuk kera bechura mirah enggau bepetik nya kuat agi ngeluarka bau rengut taja pen kulit iya jampat pechah enti dibanding kulit periuk kera bechura gadung ti liat agi.

Siku pedaja lemang ari periuk kera, Laileengo, 58, madahka lemang ti dipanduk ngena periuk kera bebau rengut sereta belemak agi.

Iya madah, nya meh ti ngasuh pengasai lemang ti dipanduk ngena periuk kera bebida ari lemang ti ditunu dalam ruas.

Indu penakan Bidayuh-China nya madahka penyelai nya ngasuh mensia mayuh rindu agi meli lemang dipanduk ngena periuk kera taja baru keterubah meli pemakai nya.

“Lemang periuk kera ti digaga aku agi ngena berau pulut enggau santan ti nyadi perengka pemun ba pengawa ngasilka pemakai tu.

“Udah nya, berau pulut ti digulai santan tu deka disimpan dalam periuk kera lalu dikesuh tauka dikukus nyentuk mansau.

“Rega lemang tu bebida nitih bansa lemang. Enti lemang asal (nadai belauk) dijual enggau rega RM2 siti tang enti lemang belauk manuk enggau sambal undang dijual ngena rega RM2.50 siti,” ku iya rambau dirandau Suara Sarawak.

BEBAU RENGUT… Lemang ti digaga ari periuk kera bebau rengut enggau belemak agi enti dibanding lemang ditunu dalam ruas.

CHARA NGAGA
Nangkan nya, Laileengo madah, chara ngaga lemang periuk kera nya chukup muntang semina begunaka pengeliat ati.

Keterubah, ku iya, kitai patut muka dulu ‘mulut’ enggau ‘janggut’ periuk kera nya lalu dikempat ngambi muntang agi kitai muai utai kamah dalam periuk kera nya baka debu enggau daun rangkai.

“Periuk kera ti udah diisi ngena berau pulut ti digulai enggau santan deka dikukus abis nadai dua jam bepanggai ba pemesai periuk kera nya,” ku iya.

Iya madahka periuk kera nya berengkah tumbuh ba kebun iya lebih ari lima taun ti udah.

Laban utai tumbuh nya pedis amat ditemu, nya alai, iya ngambi inisiatif ngena nya dikena nyungkak penatai pemisi sereta ngintu utai tumbuh nya enggau manah.

PERIUK KERA MIRAH

MAYUH PEMAIK
Tebal agi mensia mayuh enda ngelala pangku pengawa besai periuk kera ba pengawa ngasil enggau nangkir kampung.

Tuai Direktor Pemansik ari Program Konservasyen enggau Guna Pemansut Agrobiodiversiti, Palan Pemansik Biodiversiti enggau Rampa Menua, Institut Pemansik enggau Pemansang Betanam Betupi Malaysia (MARDI), Dr Rosliza Jajuli madahka periuk kera ngembuan pengulih tumbuh ba tanah ti enda ami laban pemansut nutrien iya enda bepanggai ba tanah aja.

“Periuk kera ulih ngelela sereta ngempit nutrien ari daun rangkai, indu utai tauka jelu mit ti tepekul dalam iya dikena idup lalu bepanggai ba bansa enggau pemesai utai tumbuh tu empu.

“Nya kebuah periuk kera enda begunaka pemansut nutrien ari tanah aja,” terang iya.

Lebuh ba siti endur bedau ami, periuk kera ulih idup ba endur nya lalu ba timpuh bepuluh taun iya ulih mantu ngamika tanah ti nemban endur utai bukai tumbuh.

Iya madah, nya meh sekeda kebuah periuk kera muntang ditemu ba ujung kampung laban endur nya bedau tentu ami.

Lebih ngemegah, ba sekeda gaya, utai tumbuh tu ulih nyadi pemansut pemakai ngagai jelu bukai ti bela nguan endur nya.

“Ambika cunto, gerama bukit ti datai ari bansa Geosesarma endang bepanggai ba bansa Ampullaria ti tumbuh ba endur bebukit dikena ngulihka pemansut ai.

Nangkan nya, bansa periuk kera ti bukai iya nya Rafflesiana bela nyadi sarang endur kusing bansa Kerivoula Hardwickii ti chukup besai diau.

PERIUK KERA GADUNG

BERITA LAIN

Mayuh bantu ngubah pengidup rayat

DEBAK: Bemacham bansa bantu diberi perintah dikena ngubah enggau nyaga pengelantang rayat. Sapit Premier Sarawak, Datuk Amar Douglas Uggah Embas madah, nya nentuka rayat bulih

Gaji niki nipakka inflasyen

KUCHING: Perintah Besai dipinta nyemela pengawa nikika gaji nipakka tikas inflasyen ngambi pekara tu enda meri empas ngagai rega barang niki ti ngasuh atur nikika

BERITA TERBARU