Lenyau pengarap ngagai ketuai parti

Urung 1000 kaban PRS Engkilili, Batang Ai ngaga pemutus ningkil diri ari parti nya

ENGKILILI: Parti Rakyat Sarawak (PRS) Pampang Engkilili enggau Batang Ai majak ‘repuk’ sepengudah urung 1,000 kaban ngaga pemutus ningkil diri ari parti bebala mayuh.

Bela sereta madah ningkilka diri ari parti bebala mayuh nya, dia raban ti beketuaika Sapit Chairman Kaunselor Tuai Rumah (TR) Bangkong Maweng dari Ensawang, Skim Skrang madah nyereta Parti Sarawak Bersatu (PSB) nitihka singkang ex-Chairman ti mega ex Kaban Parlimen Lubok Antu William Nyalau Badak.

Nitihka pengari, Kaunselor TR Chaong ari Balui, Skim Skrang sida ningkilka diri ari parti laban lenyau pengarap ngagai ketuai parti PRS dipeda majak jauh ari tuju penumbuh, enda ninga penemu orang mayuh sereta parti dipeda dipegai sekeda orang lalu ukai penyukung tetap parti.

“Nadai mayuh pilih kelimpah ningkilka diri ari parti lalu nyereta PSB siti parti enggau penemu peranak Sarawak,” ku iya.

CHAONG

“Pun kami enda lantang ati lebuh ketuai parti muai (Datuk) William Nyalau ti chukup mayuh penyukung, disayau lalu bagas ngabas rayat begulai enggau Adun Engkilili Dr Johnical Rayong Ngipa, ” ku iya.

Iya nambah, pemutus tu chukup berat kelebih agi udah lama dalam PRS tang sida enda ulih diau selama iya kelimpah mansang ke mua ungkup nasit politik Sarawak.

“Lebuh kami meda semina PSB pelasar ke manah ungkup kami neruska pengawa ngemeratka anak bansa Sarawak.

“Kelebih agi pengawa tu disukung ketuai ti ngemeratka rayat, ninga sebana penyukung kelimpah nyadi sebuah parti ti digulu mayuh raban bansa,”ku iya.

Ditanya kemaya sida nganjung surat nyurutka diri, Chaong ti nyadi Ketuai Pemadah PRS pampang Engkilili madah, iya deka nganjung surat nya enda lama agi.

Ku iya, sida deka mantu kimpin semua chalun PSB kelebih agi ba Ngemah enggau Batang Ai ngambika chalun parti nya ulih ngerampas kerusi nya ungkup PSB.

“Kami deka meri pemujur tu ungkup PSB ngambi nunjukka parti menua tu agi diterima orang Sarawak,” ku iya seraya madah sida bela bisi datai rambau Pengerami Ngelancharka PSB Ngemah apin lama ke udah kelai sukung ngagai chalun parti nya.

Iya mega madah, sida nyukung Kepala Menteri Datuk Patinggi Abang Johari Tun Openg lebuh ngarika Sarawak kelebih agi negika hak Sarawak nitih Sempekat Malaysia 1963 (MA63) enggau OMO 1957.

Suara Sarawak