Lima hari nadai kes baru positif Covid-19

KUCHING: Sapit Kepala Menteri madah nyengkaum sehari tu bisi lima hari Sarawak mujur ngerikodka nadai kes baru positif Covid-19.

“Tu siti pemar ti ditapi kitai ngambika statistik tu mengkang nurun belama.

“Kitai meseti bebendar beratika pengawa tu ngambika penusah gelombang kedua baka ba sekeda menua enda nyadi ngagai nengeri kitai,” ku iya nambah.

Uggah ke mega Chairman Komiti Penyamgga Penusah Ngenyit Nengeri Sarawak (JPBNS) madah munyi nya ba aum pemberita di Begunan Dun Lama ditu, lemai tu tadi.

Pekara tu ku Uggah, semina ulih dijapai enti sema semua rayat bekerejasama enggau perintah nagang pengerekai igi penyakit Covid-19.

Uggah mega minta rayat ba nengeri tu ngambika enda nabur berita bula ba media rama laban nya semina deka meri mayuh saru penemu lalu enda mantu ngurangka pengerekai igi penyakit Covid-19.

Ku iya, sida ti ditemu bisi naburka berita bula deka diukum piak ke bekaul.