Lima inisiatif nagang Covid-19 udah dibantai tadi

KUCHING: Perintah Sarawak mantaika lima inisiatif nagang pandemik Covid-19, ku Sapit Kepala Menteri Datuk Amar Douglas Uggah Embas.

Iya madahka inisiatif keterubah nambahka penyampau tubuh staf Opis Pengerai Nengeri Sarawak (JKNS) ungkup pengawa beperesa, nyendiaka kereban makmal enggau neritka atur.

“Inisiatif kedua kitai deka numbuhka Tim Nyidi Kontak Dampih ngambi mantu JKNS nyidi kontak dampih ngaul kes positif Covid-19.

“Udah nya kitai neritka atur ba adan menua ngambi nagang sida ke mai igi penyakit nyengkaum jelu.

“Inisiatif ketiga ngaul pengawa neritka atur tama ke Sarawak nengah aplikasyen online EnterSarawak enggau E-Health Declaration Form sereta nyendiaka palan kuarantin,” terang iya.

Uggah mansutka jaku nya lebuh nyaut tanya Adun Demak Laut Dr Hazland Hipni pasal Langgur Strategik Sarawak nagang pengerekai Covid-19 enggau igi penyakit bukai dudi hari ba Aum Dun Ke-18, ditu tadi.

Iya ti mega Chairman Komiti Penyangga Penusah Ngenyit Nengeri Sarawak (JPBNS) madahka sida udah ngelanggur strategik ngambi ngenegapka Sarawak ulih nagang pandemik ke majak ngerekai diatu.

Suara Sarawak