KUCHING: Lima jaguh Para angkat berat ari Sarawak deka ngarika Malaysia ba Pekit Angkat Berat Para Dunya 2021 di Georgia, Rusia, bulan November tu.
Tuai Jurulatih Angkat Berat Malaysia, Jamil Adam madah, pemenang midul emas kategori 72 kilogram (kg) Lumba Paralimpik Tokyo 2020, Bonnie Bunyau Gustin entara atlit ke deka ngarika menua ngagai pekit dunya nya.
Pia mega, tiga iku atlit baru ke bukai mega deka masuk pekit dunya tu iya nya Nicodemus Manggoi (88 kg), Bryan Junency Gustin (80 kg) enggau Sonia Agon (72 kg).
“Lima iku atlit para Sarawak deka ngarika menua bepekit ba lumba dunya nya ila.
“Semua sida bepenau enggau ngembuan mayuh peneleba lalu aku andalka sida ulih nempa sejarah baru,” ku Jamil ba aum pemberita, lemai ensanus.
Jamil betuaika raban angkat berat Para Sukma Sarawak udah ngatur pejalai nemuai meri basa ngagai Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit, Datuk Seri Hajah Fatimah Abdullah di opis iya, ensanus.
Sama datai Menteri Muda Pengintu Pengelantang Komuniti, Datuk Francis harden Hollis enggau Menteri Muda Orang Indu, Ruang Bilik enggau Pemansang Anak Mit, Datuk Rosey Yunus.
Ku Jamil, iya nadai netapka tagit ngagai semua atlit nya bulih midul dalam pekit dunya nya.
Kebuah pia ku iya, nya pekit ke patut dipasuk atlit para ba seraya dunya ngambi ngerebut peluang ngagai Lumba Paralimpik Paris 2024.
“Aku endang nadai netapka tagit ngagai semua sida laban nya pekit ke emsti dipasuk atlit para serata dunya ngambi ngerebut ‘tiket’ masuk Lumba Paralimpik Paris 2024,” terang Jamil.
Jamil mega melabaka dua ‘manuk sabung’ kitai (Bonnie Bunyau enggau Jong Yee Khie) ulih mai pulai midul nitihka status seduai diatu.
Nangkan nya, Fatimah andalka semua lima iku atlit Sarawak ulih nempa sejarah baru ba lumba dunya nya ila.
“Sida bepenau, ngembuan peneleba lalu aku melabaka sida deka mai pulai midul lebuh beratika pengelebih sida,” terang iya.
Iya mega madah, semua atlit para Sarawak ngena peluang ba pekit nya mantaika penau sida.
“Tu mih maya kita (bala atlit para) nempa sejarah baru laban aku andal sereta pechayaka atlit para Sarawak deka bebendar teulihka pemujur ba tikas dunya,” terang Fatimah baru.
