Lima juluk besai meseti digaga MTES

KUCHING: Bisi lima pejalai besai meseti digaga Kaunsil Pangatur Ekonomi Sarawak (MTES) dikena nyapai juluk ngagai pengelantang ekonomi, rama inklusif sereta ke pemaik rampa menua manggai taun 2030.

Kepala Menteri Datuk Patinggi Abang Johari Tun Openg madahka pejalai keterubah iya nya langkar kereja sereta polisi atur pengawa dikena meranakka puku menua luar sereta dagang peribit.

“Pengawa meranakka puku chukup beguna dikena nyukung penumbuh kelimpah netapka polisi, pejalai pengatur ti betul sereta pengawa ngatur ti lurus.

“Pejalai kedua iya nya ngatur ejensi ari sukut komunikasyen enggau sinergi ngambika juluk ulih dijapai,” ku iya.

Iya madah munyi nya ba pengawa muka aum keterubah MTES di Wisma Bapa Malaysia ditu, kemari.

Perintah Sarawak numbuhka MTES dikena nyadi perambu timpuh panjai mulaika ekonomi nengeri pengudah pengerekai igi penyakit Covid-19 pengudah diberi timpuh ngagai bulan September mantaika asil randau sida.

Ku Abang Johari, pejalai ketiga iya nya data enggau inovasyen dikena ngerembaika produk beungkus besai, nambahka agi pengelikun sereta nyumanka rampa menua.

“Kitai meseti seruran meranakka puku ba pengawa pansik enggau pemansang (R&D) ngena teknologi dron enggau IoT ngambika semua sektor ngali chakah sereta likun.

“Nya alai kita deka ngena teknologi digital mandangka servis ngambika seriris enggau menua mansang ke bukai,” ku iya.

Ku iya nambah, pejalai keempat uya nya infrastruktur enggau penyambung dikena nyadika Sarawak enda tinggal ba renggat global.

“Nya alai kitai deka meri bejal perengkaguna au enggau elektrik ngagai rayat Sarawak enggau penuh kelimpah nyambung menua ulu ngena jalai alun.

“Berindik ari nya, kitai numbuhka penyambung jalai alun ba menua tebing ai kelimpah ari Jalai Besai Pan Borneo sereta palan data ti nyadi tulang belakang teknologi penerang,” ku iya.

Abang Johari mega madahka Sarawak deka ngerembai sereta ngemansangka penyakah ari sukut penyangkai kapal enggau penyambung nengah tasik enggau langit.

Ku iya, Sarawak ngembuan infrastruktur ti engkeman ti ulih nyukung industri, narit pemeranak puku enggau nyambungka menua ekonomi ngagai dunya luar manggai taun 2030.

“Pejalai ke penudi iya nya pengelandik enggau dagang ti nitihka guna industri kelimpah nyendiaka nembiak Sarawak ti ulih besemekih enggau pangan diri.

“Nya alai, renggat udah tu iya nya MTES deka mansik inisiatif enggau projek ke diguna bepelasarka pemansang langkar tikas keterubah,” ku iya.