KUCHING: Kes positif Covid-19 di Sarawak sehari tu diperati nurun ngagai siti angka iya nya ngerikod semilan kes nyadi ba tiga pelilih menua.
Komiti Penyangga Penusah Ngenyit Nengeri Sarawak (JPBNS) madah, ari penyampau nya enam kes di Pelilih Menua Kuching, dua kes di Miri enggau siti kes di Samarahan, ngujungka semua kes positif di nengeri tu bisi 881.
“Ungkup Pelilih Kuching, lima kes baru datai ari Kluster Greenhill, udah nya siti agi kes ari siku lelaki peranak menua kontak semak enggau kes Ke-847.
“Dua kes positif di Pelilih Miri, siti ari nya ari Kluster Green Hill iya nya peranak menua tu ke mega kontak enggau kes ke-829, kes kedua iya nya lelaki peranak menua ditemu nengah peresa lepas bisi kelai kena rampit (Sari).
“Siti kes di Pelilih Samarahan iya nya siku lelaki ke bisi sejarah pejalai ke Melaka lalu kes dikategori kes ke bisi dirampit ari sitak ke bisi penyakit Covid-19 (Import B),” ku penerang nya, sehari tu.
Nitihku penerang JPBNS, nadai kluster baru ditemu lalu lima kluster ke agi ngerekai iya nya Kluster Baki di Pelilih Kuching, Kluster Bah Arnab di Pelilih Kuching, Kluster Putra di Pelilih Bintulu enggau Kluster Seladah di Pelilih Kuching ke bela nadai ngerikod sebarang kes.
“Nangkanka nya Kluster Greenhill ngerikod penambah enam kes positif, ngujungka penyampau semua bisi 42 iku nyengkaum kes indeks.
“Bisi 143 iku orang udah diperesa lalu 101 iku negatif lalu tikas kes positif kluster tu bisi 29.37 peratus,” ku iya.
