KUCHING: Sarawak sehari tu ngerikod lima kluster baru ke alai empat ari nya di Kuching ngaul kluster komuniti sereta 582 kes baru positif Covid-19.
Nitihka penerang ari Komiti Penyangga Penusah Nengeri (JPBN), bekau ari nya ngujungka 78 kluster agi ngerekai ba menua tu tang semina tujuh kluster ti ngerikod 65 kes baru.
“Kluster baru dirikodka kemari baka Kluster Kampung Paya Mebi (21 kes positif), Kluster Kampung Quop (12 positif), Kluster Kampung Senari (25 positif) enggau Kluster Telaga Air (34 positif) di Kuching mungkur peranak ba genturung pendiau nya.
“Semua kes udah dipasuk ngagai Sepital Besai Sarawak (SGH) sereta Palan Kuarantin enggau Ngubat Pesakit Covid-19 (PKRC),” ku penerang nya, ditu tadi.
Ngelansa silik, JPBN madahka kluster bukai iya nya Kluster Sungai Mangga di Simunjan ngaul palan endur gawa.
“Kluster tu mungkur pengereja enggau orang rumah sebuah ladang sawit di Sungai Mangga ke alai 55 iku ditukuka positif seraya 105 iku ditemu negatif,” ku penerang nya baru.
JPBN mega madah, lima kluster ditukuka punas baka Kluster Putai di Bukit Mabong, Kluster Kampung Tabuan Haji Drahman di Kuching, Kluster Iris Garden di Kuching, Kluster Kampung Taba Sait di Kuching enggau Kluster Lorong Perlis Empat di Miri.
Nambahka nya, Pelilih Betong mali ari status mirah ngagai oren pengudah ngerikod 40 kes berampit diripotka ba timpuh 14 hari ke udah.
