KUCHING: Opis Pengerai Nengeri Sarawak ngenukuka lima kluster punas kemari pengudah nadai ngerikodka kes baru dalam timpuh 28 hari.
Komiti Penyangga Penusah Ngenyit Nengeri (JPBN) dalam siti penerang media kemari madahka kluster tu iya nya Kluster Jalan Green, Kuching, Kluster Buluh Pasi, Meradong, Kluster Sena, Miri, Kluster Begalak, Song enggau Kluster Sungai Atap, Meradong.
Taja pia, dua kluster nambah kemari iya nya Kluster Jalan Bintulu-Sibu, Tatau enggau Kluster Tarat Tani, Serian.
Kluster Jalan Bintulu-Sibu, Tatau datai ari sebuah institusyen ngaul sebuah sekula sekondari enggau peranak ba Kilometer 60, Jalai Bintulu-Sibu di Pelilih Menua Tatau.
Kes indeks tu datai ari siku nembiak beumur 16 taun ti beperesa ba Klinik Pengerai Tatau kena 6 April ngujungka iya ditukuka positif kena 10 April.
Nangkan nya, Kluster Tarat Tani, Serian datai ari sebuah komuniti di kuarters perintah di Tarat ba Pelilih Menua Serian.
Kes indeks tu datai ari siku indu beumur 39 taun ti beperesa ba Klinik Pengerai Tarat kena 9 April lalu iya ditemu positif Covid-19 kena 10 April.
Kes indeks tu ngerampit dua anak iya ti mega nembiak sekula ba SK Tarat Serian.
Kelimpah ari nya, JPBN madahka Pelilih Menua Lawas bebali pulai ngagai status gadung kemari pengudah nadai ngerikodka kes berampit dalam timpuh 14 hari.
Taja pia, Pelilih Menua Belaga enggau Kanowit bebali ngagai status mirah ari oren laban ngerikodka 45 kes enggau 56 kes dalam timpuh 14 hari.
Pelilih Menua Pusa bebali ngagai status kuning ari gadung laban ngerikodka siti kes berampit kemari.
