Lima lelaki, siku indu ditan salah guna dadah

KOTA SAMARAHAN: Lima lelaki enggau siku indu dipelaba bekaul kes salah guna dadah udah ditan Ejensi Anti Dadah Nasional (AADK) Samarahan kena Hari Empat tu tadi.
Ketuai Pemesai AADK Kota Samarahan Izzuddin Sedi madahka semua sida nya ditan asil ari Operasyen Cegah di pelilih Kampung Jaie enggau Kampung Tanjung Bundong.
Ku iya, operasyen nya dipejalai asil ari kompelin mensia mayuh sereta penerang pansik ti diterima sida sebedau tu.
“Semua enam iku sida rayat menua beumur entara 19 ngagai 27 taun.
“Asil ari pansik dia ai kemi sida positif dadah bansa syabu,” ku iya dalam siti penerang media, kemari.
Tandu iya, kes tu dipansik ba baruh Seksyen 3(1) Akta Penagih Dadah (R&P) 1983.
Dulu ari nya, iya madahka penyampau semilan iku pemesai enggau raban AADK Samarahan bekaul dalam operasyen tu.
Nangkan nya, Izzuddin mega ngelalau mensia mayuh ngambika nadai bekaul enggau pengawa proses, nyadung, nyeludup, nyual sereta gian dadah.

Entara raban lima iku lelaki enggau siku indu ke ditangkan raban AADK Samarahan kena Hari Empat tu tadi.

Suara Sarawak