Lima menyanak nerima bantu Hope Place

KUCHING: Indai tunggal, Siti Ramlah binti Mon sereta empat anak iya udah nerima bantu pemakai ari Hope Place apin lama ke udah.

Siti enda diteju kediri aja begulai enggau bala anak iya taja udah ditinggalka niang laki iya midang kena Januari nyin tadi.

Baka indai tunggal bukai, Siti deka naka ulih ngibun enggau ngemesaika anak iya kelebih agi anak pengkuan baru manggai tiga taun.

Diatu Siti bisi bedajaka pemakai beguring ba bansal tisi jalai besemak enggau rumah iya lalu abis mayuh ulih tudah RM50 ngagai RM60 sehari.

Sida menyanak diau di Kampung Sindang, Kota Samarahan, ba sebuah rumah digaga niang laki iya suba.

Taja pia rumah nya empai entu tembu ke alai dapur enggau dinding luar empai diplaster lalu sekeda ke bukai agi lelenga.

Kelimpah ari nerima bantu pemakai ari Hope Place, Baitumal mega bisi nyuaka pemeri penyampau RM1,200 ngagai Siti.

Iya mega benung minta bantu pengelantang rama diatu.

Penerang silik tau betanya ngagai Hope Place Kuching ba lumur 082-505987 maya jam opis gawa, 8.30 pagi – 5.30 lemai (Hari Satu ngagai Hari Lima), 8.30 pagi – 12.30 tengahari (Hari Enam).

Semua pemeri endang diterima lalu bala penerima deka diberi bepelasarka peminta.

SINU… Kelvin Wan nyuaka bantu ngagai Siti disempulang bala anak iya.

Suara Sarawak