Lima pekara dikena mutar pengirau ati

Baka ai sungai bisi maya pasang lalu bisi mega maya surut. Pia mega ba pengidup kitai mensia bisi maya kitai berasai chukup rindang, asaika diri empu aja ngempu dunya sempama baka meda mua hari ke tampak pegari perenching dipanchar mata panas tang anang saru laban nya tau bebali petang sebarang maya.

Tu endang udah gaya pusin pengidup endur kitai enda ulih lari ari pekara ti tau ngachau ngeregau ba lubuk ati ngujungka kitai berasai teguran runding tauka bisi nangi ba dalam ati.

Minggu tu, Penghulu Ruai deka ngelansa siti pekara enggau pemacha mayuh pasal pengirau ati ba kitai mensia.

Reti pengirau ati tu iya nya penangi tauka asai ti enda lantang ba ati kitai sentang sesebengkah pekara ke udah nyadi tauka deka nyadi sekalika nya legi, pagila, lusa enggau sebarang maya.

Tu kebendar bansa pikir ti ngasuh kitai berasai nyau baka ngidupka baru pekara ke udah nyadi sereta ngemendarka pekara nya nyadi ba maya dudi.

Kitai nyau enda badu-badu berundingka pekara nya. Tu ngujungka pengirau ati nya tadi nyadi pun penanggul ba pengidup kitai mensia.

Pangka ari pengirau ati tu tau ngujungka kitai berasai tusut runding, darah niki, lemah jantung, enda chukup tinduk, pedis pala, pedis isi enggau mayuh agi ke bukai.

Nya alai, kala tauka enda pengirau ati mantu kitai mutar penanggul ti nekul? Tentu nadai nih ya.

Nya kebuah pengirau ati tau nganchurka pengarap enggau pengandal.

Pengirau ati mih nyadi dinding kitai nyapai pemujur. Pengirau ati mega ngikis ulah optimistik ti ngujungka kitai enda ulih meda pemaik ba sebarang aja gaya pendiau.

Tau dipuntang enggau jaku pandak pengirau ati tu adan tauka pengujung jalai!

Ambika banding ba sesebengkah opis orang ti balat irau ati dipeda enda bagak tauka diau diri.

Pekara tu deka meri empas ke enda manah ngagai asil kereja sida.

Taja pia, bisi lima pekara dikena mutarka pengirau ati ba kitai mensia.

Kesatu, meseti bisi perambu. Kitai patut duduk jenuh lalu berundingka penanggul ti nekul.

Giga kebuah lalu rintaika chara mutar, udah nya pilih chara mutar ke pemadu engkeman.

Ari nya kitai deka ulih mutar penanggul nya enggau manah lalu enda ngelak pekara nya datai ungkup kali ti kedua.

Kedua, meseti optimistik. Ulah tu mih senyata dikena ngurangka pengirau ati.

Enti kitai optimistik, dia kitai deka bisi pengadang sereta pechaya penanggul nya deka ulih teputar.

Ingat kaban… pekara pedis enda kala lama lalu orang ke tan ati selalu iya deka menang.

Ketiga, kitai meseti berani. Orang berani enda kala ngasaika diri takut tauka ngeri ngagai sebarang orang.

Orang baka tu diperati lebih kering lebuh napi pekara ti ngenakut. Kitai meseti angkat berani napi penanggul lalu bebendar arapka diri empu ulih napi penguji.

Keempat, meseti dilaban. Anang semina duduk berundingka penusah diri. Gaga pemutus ti positif.

Anang kelalu ngandalka orang bukai datai nyaup tang kitai empu patut angkat mutarka penanggul nya.

Kelima, meseti besampi. Kangauka Tuhan datai muka jalai ba genap penanggul ditapi kitai laban mensia tu utai gaga petara, pechaya mih iya bisi nyendia jalai mutar pengirau ati kitai anak mensia.

Suara Sarawak