KUCHING: Lima iku pengari rayat Dayak diberi pengandal ke chukup besai mangku tanggungpengawa ke manah dalam kabinet baru 2020 ke dibantai Menteri Besai Tan Sri Muhyiddin Yassin, lemai tadi.
Sida tu iya nya Kaban Parlimen Kapit Datuk Alexander Nanta Linggi, Kaban Parlimen Kanowit Datuk Aaron Ago Dagang, Kaban Parlimen Saratok Ali Biju, Kaban Parlimen Puncak Borneo Willie Mongin enggau Kaban Parlimen Lawas Datuk Henry Sum Agong.
Dalam kabinet ke baru tu, Alexander dichiri nyadi menteri penuh lalu iya dikearap ngiring Opis Menteri Dagang Dalam Menua enggau Pekara Penguna lalu dibantu Datuk Rosol Wahid.
Sebedau tu, iya kala megai tanggungpengawa nyadi Sapit Menteri Pemansang Menua Pesisir enggau Kandang Menua berengkah ari taun 2013 ngagai 2018 apin Perintah Pakatan Harapan menang ba pengawa Bepilih Besai Ke-14 (PRU14).
Empat agi pengari rayat Dayak ke baru diangkat megai tanggungpengawa nyadi sapit menteri iya nya Datuk Aaron Ago Dagang, Ali Biju, Willie Mongin enggau Datuk Henry Sum Agong.
Aaron sebedau tu kala nyadi sekretari politik ngagai Menteri Pengeluar Kuasa, Komunikasyen enggau Multimedia, Datuk Amar Leo Moggie sebedau dipilih ngagai Parlimen Malaysia.
Ba kabinet ke baru iya dichiri nyadi Sapit Menteri Pengerai begulai enggau Datuk Dr Noor Azmi Ghazali mega nyadi Sapit Menteri betuaika Datuk Seri Dr Adham Baba.
Udah nya, Kaban Parlimen Saratok dichiri nyadi Sapit Menteri Pengeluar Kuasa enggau Pengeraja Asal betuaika Datuk Dr Shamsul Anuar Nasarah ti nyadi menteri penuh opis menteri nya.
Kelimpah ari nya, berita manah ngagai kitai Dayak mega Kaban Parlimen Puncak Borneo Willie dichiri nyadi Sapit Menteri Pengawa Bekebun enggau Komoditi begulai enggau Datuk Seri Dr Wee Jeck Seng lalu betuaika Datuk Dr Mohd Khairuddin Aman Razali.
Kepenudi iya nya, Kaban Parlimen Lawas Datuk Henry Sum Agong mega baru dichiri nyadi Sapit Menteri Pemansang Menua Pesisir begulai enggau Datuk Abdul Rahman Mohamad betuaika Datuk Dr Abd Latiff Ahmad ti nyadi menteri penuh.
