Lima Perambu Undang-Undang dipejurai

KUCHING: Bisi lima iti Perambu Undang-Undang (RUU) perintah deka dipejurai dalam Aum Kedua Renggat Kelima Dun Ke-18 tu ila.

Speaker Kunsil Nengeri (Dun) Datuk Amar Mohamad Asfia Awang Nassar madahka RUU tu iya nya Perambu Undang-Undang Bekal (2021) 2020, Perambu Undang-Undang Bekal Tambah (2020) 2020, Perambu Undang-Undang 2020 Atur Sementara Ngurangka Pangka Penyakit Coronavirus, 2019 (Covid-19), Perambu Undang-Undang 2020 Ubah Atur Kaunsil Kandang Menua enggau Perambu Undang-Undang 2020 Ubah Atur Konstitusyen Perintah Sarawak.

“Perambu Undang-Undang Bekal (2021) 2020 deka dibacha Kepala Menteri ti mega Menteri Wang Enggau Pengatur Ekonomi Datuk Patinggi Abang Johari Tun Openg kena 9 November ba bacha keterubah enggau kedua lalu kena 13 November ba bacha ketiga.

“Perambu Undang-Undang Bekal Tambah (2020) 2020 deka dibacha Sapit Kepala Menteri ti mega Menteri Wang Kedua Datuk Amar Douglas Uggah Embas kena 9 November ungkup bacha keterubah lalu 11 November ungkup bacha kedua enggau ketiga,” ku iya.

Asfia bejaku munyi nya ba aum pemberita beserimbai enggau Aum Kedua Renggat Kelima Dun Ke-18 di Opis Parti Pesaka Bumiputera Bersatu (PBB) ditu, kemari.

Nangkan nya, iya madahka Perambu Undang-Undang 2020 Atur Sementara Ngurangka Pangka Penyakit Coronavirus 2019 (Covid-19) deka dibacha Uggah baru kena 9 November.

“Kelimpah ari nya, Perambu Undang-Undang 2020 Ubah Atur Kaunsil Kandang Menua deka dibacha Menteri Kaunsil Kandang Menua enggau Pengawa Berumah Datuk Sri Prof Sim Kui Hian kena 9 November.

“Lalu kepenudi Perambu Undang-Undang 2020 Ubah Atur Konstitusyen Perintah Sarawak deka dibacha Menteri Dagang Temuai, Seni, Main Asal Datuk Abdul Karim Rahman Hamzah kena 9 November ungkup bacha keterubah lalu 10 November ungkup bacha kedua enggau ketiga,” ku iya.

Ku iya, aum Dun serak tu dipejalai lima hari berengkah 9 November nyentukka 13 November.

“Aum deka berengkah pukul 9 pagi lalu ulih dilanjarka lebih ari pukul 6.30 lemai nyema bisi pekara dikerandau ngelui ari jam nya,” ku iya.

Suara Sarawak