KUCHING: Polis diatu benung nyidi lima iku peranak Indonesia ke ngelarika diri pengudah beperesa Covid-19.
Ketuai Polis Pelilih Kota Samarahan, DSP Sudirman Kram madahka sida lima nya udah beperesa kena 21 Disember nyin tadi.
Ku iya, dua ari sida nya ditukuka positif Covid-19 kena 23 Disember tang udah ngelarika diri sehari sebedau nya.
“Pansik tumu tetemuka sida lima tu nyengkaum dua iku saspek digaji ngupas kandang ladang di Jemukan Ulu, Asajaya.
“Pengaji saspek udah dipadahka Opis Pengerai Bagi Menua Samarahan ke alai dua ari lima iku pengereja iya positif Covid-19 lebuh pemutus peresa pansut kena 23 Disember tu tadi,” terang iya.
Sudirman madahka saspek ditemu positif nya benama Harianto Safari, 41 taun enggau Milhan Madi, 23 taun seraya tiga iku ke bukai benama Randi, 30 taun, Hamsar, 27 taun enggau Rija Riansyah Tan Rabudin, 29 taun.
Berindik ari nya, Indu Opis Polis Pelilih Kota Samarahan minta kerejasama semua raban ke bisi sebarang penerang bekaul telefon ngagai sida ba lumur 082-662101 tauka Pegawai Pemansik, Inspektor Mohd Syukri Jasni (011-6564 3820).
