SARIKEI: Perintah udah ngemendar lima projek ngaga jalai kebun ba baruh Program Fasiliti Betanam Betupi (AFF) Jaya Tani ba sitak Repok.
Sapit Menteri Pengeraja Asal, Rampa Menua enggau Ubah Klimet, Datuk Seri Huang Tiong Sii madah, nya siti ari projek dipinta iya sebedau tu ari Kaunsil Pemansang Tanah Sarawak.
Iya madah, projek nya beguna amat dikena mantu bala pekebun ngangkut asil kebun sida ke pasar.
“Aku berasai lantang laban projek tu udah dikemendar lalu abis nadai ulih mantu bala pekebun mit ba sitak Repok ditu.
“Kebendar, tu siti ari inisiatif beguna dikena meri pemaik ngagai sida nyual asil kebun,” ku iya.
Berebak enggau nya, siti licha bisi diatur begulai Kaunsil Pemansang Tanah Sarawak enggau Palan Servis ADUN Repok ditu, kemari.
Licha nya dikena meri penerang bekaul projek nya ti mungkur pengempu rumah, tanah enggau kunteriktor.
“Projek tu disadang tembu ba timpuh lapan bulan. Aku ngarap semua meri kerejasama ngambi projek tu lanchar enggau meruan,” ku iya.
Jalai nya mungkur Sungai Merudu, Sungai Paoh, Sungai Tapang, Sungai Kawan enggau Sungai Baron.
“Nya alai, Perintah Gempung Parti Sarawak (GPS) seruran mendingka sebana rayat sereta ngiga bemacham inisiatif dikena mutar pekara tu.
“Pengawa bejalaika projek tu siti ari pekara nya,” terang iya.
