Lima serikat bas setuju meri tambang RM1

SIBU: Inisiatif tambang bas RM1 ungkup servis bas ba mengeri Sibu deka dipejalai enda lama agi.

Menteri Perengka Pengangkut Datuk Lee Kim Shin madah, servis lima buah serikat bas ditu udah diguna Opis Menteri Perengka Pengangkut Sarawak ngemujurka inisiatif nya.

Ku iya, lima serikat bas tu iya nya Sungai Merah Bus Bhd, Lanang Bus Company Bhd, Rajang Transport Sdn Bhd, Teku Road Bus Company Sdn Bhd enggau Borneo Amalgamated Transport Company Bhd.

“Kami udah baum enggau pengari serikat nya ngambi ngangauka sida nyereta inisiatif tambang bas baka nya.

“Lebuh ngambi bagi ba inisiatif tu, serikat bas meseti rejister enggau Kaunsil Pekara Lisin Entukar Dagang Sarawak (LPKP),” terang iya.

Kim Shin mansutka jaku nya pengudah baum enggau pengempu sereta pengari serikat bas nya ngambi bejalaika inisiatif tambang bas RM1 ba Opis Residen Sibu, ditu tadi.

Suara Sarawak