Limbang badu suntuk ai

LIMBANG: Berita manah ungkup peranak di Limbang laban enda lama agi Tangki Ai Beresi Berawan deka tembu lalu ulih dikena.

Kepala Menteri Datuk Patinggi Abang Johari Tun Openg madahka pemisi tangki ai baru tu deka nyendiaka bekal ai ngagai semua kandang menua di Limbang.

Ku iya, Tangki Ai Berawan ke diatu semina ulih nangkup peminta manggai 20 MLD tang penembu tangki ai baru nya ulih nangkup peminta manggai 40 MLD.

“Tangki baru tu ulih nyendiaka bekal ai beresi ngagai Medamit enggau serap menua di Limbang.

“Kebendar, projek tu udah tembu lalu ba timpuh dua minggu tu sida agi meresa kualiti ai enggau aku pechayaka ai tu bekualiti,” terang Abang Johari.

Abang Johari mansutka jaku nya ngagai pemberita pengudah pejalai ngabas seraya gawa ngagai Limbang, ditu kemari.

Abang Johari mega udah ngemendarka projek jalai ari Simpang Sakung ngagai Ulu Lubai sepanjai 13 kilometer.

Suara Sarawak