Linne belajar ngaga kek ari internet

KUCHING: Penanggul sekeda raban ba menua pesisir deka ngintu program baka Hari Pengada, Betunang tauka Melah Piang ti begunaka kek sekumbang Atur Mindah Betagang (PKP) ngujungka Linne Sylvia Kundang, 35 taun tebuka runding nyendiaka servis ngaga kek awakka bisi djiual ngagai bala sida semenua ti nguna.

Linne ti diau ba Kampung Raba Sebuyau madahka, pengelandik ngaga kek tu berengkah ari pengeran diri ketegal sinu meda bala anak ti chukup rindu makai kek.

“Bala anak aku deka amai makai kek, dia aku tebuka runding nguji ngaga kek kediri ungkup diempa bala anak di rumah. Tambah mega, di Sebuyau ditu nadai mayuh bansa kek ulih dibeli kelimpah rega ti numbas iya mar setipak enggau pemar ngaga,” ku iya lebuh dirandau Suara Sarawak.

Indai beranak empat tu madahka, iya bepun belajar ngaga kek kediri asil beratika bup resipi, ‘youtube’, televisyen enggau begiga penerang sentang chara ngaga kek ba internet.

“Aku nguji ngaga belubah sereta sabar, maya kek aku enggai nyadi, aku berengkah ngaga baru nyentukka kek nya nyadi.

Linne Sylvia Kundang

“Pengelandik tu dikunsika aku ba ‘facebook’ enggau ‘whatsapp’, ari nya aku berengkah bulih peminta bala semenua enggau kaban belayan ari kampung bukai lebuh sida bisi ngintu pengerami baka betunang, ngintu hari pengada, ngintu Hari Orang Indu enggau pengerami bukai.

“Sekeda bala ti diau ba Kuching enggau Semenanjung Malaysia mega bisi ngudar kek ari aku dikena ngintu hari pengada apai indai sida ti diau di menua,” ku iya.

Linne madahka, kek ti dijual iya digaga nitihka pemesai, peminta enggau bajet orang ke meli.

“Pengelama aku ngaga kek bepenggai ngagai pemesai enggau chura ti dipinta orang meli, lalu kek aku dijual berengkah ari rega RM10 nyentuk RM100 sigi.

“Dalam sebulan aku ulih ngaga sereta nyual urung 40 ngagai 50 igi kek,” ku iya.

Ku Linne, entara pemar ti ditapi iya lebuh bedagang kek iya nya nadai palan endur nyimpan nyema peminta ngaga kek datai berepak.

“Lebuh peminta ngaga kek mayuh aku nadai palan endur nyimpan kek laban peti ais enda besai.

“Pia mega, lebuh bisi awak ke pasar aku meli mayuh barang dikena ngaga kek laban enda suah ke mengeri, nya ngujungka aku nadai palan endur engkah barang nya kelebih agi peti ais.

“Kelimpah ari nya, menua kami ditu suah napi penanggul nadai karan (blackout), nya ngasuh pengawa aku suah tejanggal,” ku iya.

Taja pia, Linne madahka iya tetap sabar napi semua penguji tu laban iya meda peluang dagang kek di menua pesisir manah.

Dalam sebulan Linne ulih ngaga sereta nyual urung 40 ngagai 50 igi kek.

“Orang ti meli kek aku madahka kek aku nyamai laban aku ngena ‘fresh cream’, nya ngujungka kek aku enda kelalu beminyak kelimpah kurang manis.

“Pia mega, chura kek ti digaga aku endang nitihka chura ti dikerindu orang jeman diatu kelebih agi chura ti dikerindu bala nembiak mit lebuh ngintu hari pengada,” ku iya.

Ku Linne, iya ngarapka dagang kek tu terus maju sereta meruan bulih peminta ari mensia mayuh.

“Terima kasih ngagai sukung bala pemeli ti kala ngasaika kek aku sebedau tu.

“Ngarapka dagang tu terus maju, lalu perambu aku ngarap diri ulih muka kedai kek jemah.

“Pia mega, aku ngarapka perintah meri bantu sereta tulung ngagai dagang aku enda ngira bantu mata duit tauka perengka dikena ngaga kek,” ku iya.

Sapa ti deka ngudar kek ari Linne tau betelefon ngagai Linne ba lumur 0162464330 tauka ngelawa ruai Facebook Linne Sylvia.

Sapa deka ngudar kek ari Linne, ulih betelefon ba lumur 0162464330 tauka ngelawa ruai Facebook Linne Sylvia.

Suara Sarawak