Lisin arus penyambung benung diaduka perintah

KUCHING: Perintah Sarawak benung ngulihka lisin ngaduka arus penyambung ba menua tu ari Kaunsil Multimedia Sarawak (SMA).

Kepala Menteri Datuk Patinggi Abang Johari Tun Openg madah, pekara nya udah dikerandau enggau Menteri Komunikasyen enggau Multimedia (MCMC) Datuk Saifuddin Abdullah lebuh iya nemuai ke Sarawak apin lama.

“Penanggul diasaika peranak menua ulu di menua tu enggaika pengatur arus penyambung beoperasyen taja tiang pemanchar didiri laban ngumbai kandang menua nya nadai peluang bedagang.

“Nya kebuah, pengatur arus penyambung baka Celcom, Digi enggau Maxis enda nyendiaka servis nya.
“Nya alai, Perintah Sarawak meseti ngulihka lisin nya,” ku Abang Johari.

Abang Johari mansutka jaku nya ba aum pemberita pengudah ngelanchar ba sekula pechuma ba Kuching enggau Samarahan di Padang Merdeka, ditu ensanus.

Ku iya, Perintah Sarawak meseti bisi lisin ngambi ulih nyendiaka servis arus penyambung ngagai peranak menua ulu.

“Naka diatu, kitai bisi 300 tiang pemachar begulai enggau MCMC lalu di baruh SMA aja, kitai bisi 170 tiang pemanchar nya.

“Lebuh kitai ulih nyendiaka arus penyambung pengudah bulih lisin, peranak menua tu deka mayar bil ngagai Perintah sarawak,” terang iya.

Abang Johari nyemetak madah, bil arus penyambung nya deka murah agi laban Perintah Sarawak deka meri subsidi ngagai raban diselinting.

“Ambika banding, kitai meseti nyendiaka perengkaguna ngagai sida enggau rega ke patut lebuh kitai dekaka bala pekebun nyingkang ngagai ekonomi digital.

“Nya kebuah, inisiatif tu deka ngemuntangka raban nya meretika polisi perintah,” tandu iya.

Kelimpah ari nya ku iya, Perintah Sarawak nagit nirika 1,400 tiang pemanchar manggai taun 2025 mungkur semua menua tu.

Suara Sarawak