KOTA SAMARAHAN: Perintah Sarawak enggau Kaunsil Produktiviti Malaysia (MPC) terus bejalaika pengawa ngemanah gaya dagang di menua tu.
Nitih ke penerang MPC, entara inisiatif ti chakah dipejalai nya inisiatif Atur Malin Lisin Malaysia (MyGP) begulai enggau Raban Bekuasa Lokal (PBT) ti dipilih.
“MyGP dipegai MPC ngambi nyukung pejalai Pelin Benchi Makai Suap Nasional (NACP) di baruh Inisiatif 2.1.6 iya nya nempa chara tegap enggau meruan ba atur ngeluar ke permit sereta lisin,” ku penerang nya. MPC mega madah, sebengkah bengkel ngemanah atur malin lisin dagang udah diatur kena 1 enggau 2 Ogos tu tadi.
Ku penerang nya, bengkel nya diatur begulai enggau pegawai PBT ari Kaunsil Mengeri Kuching Selatan (MBKS), Kaunsil Mengeri Padawan (MPP), Kaunsil Mengeri Kota Samarahan (MPKS) enggau Kaunsil Pelilih Lundu (MDL).
“Bengkel nya mega dikena nampung bengkel lisin dagang ti udah diatur kena 25 Mei tu tadi enggau tuju nempa inventori lisin dagang ti dipatau PBT Sarawak enggau ngemanah pengelurus atur dagang nya.
“Tu mega nyadi pemansang ngagai pegawai PBT ngambi mayuh agi atur malin lisin dagang ti bekualiti ulih ditempa dudi hari,” ku penerang.
Nengah penerang sebaka, Direktor MPC Wilayah Sarawak Dr Mazlina Shafi’i madah, iya ngarap ke semua atur malin ti dikemanah ba bengkel nya deka dibantai chara online ngambi ulih nyadi malin ngagai peminta lisin.
Nya alai, iya meri terima kasih ngagai semua ke udah ngemujur pengawa nya lalu ngarap ke pengawa ngemanah gaya dagang ulih ditampung belama.
Sama datai pegawai Opis Menteri Pengerai Mensia Mayuh, Pengawa Berumah enggau Perintah Lokal Sarawak (MPLG) sereta Unit Transformasyen enggau Inovasyen Sarawak Sarawak (STIU) ke mega bakih strategik MPC dalam program bekaul ngemanah atur.
