BAU: Komuniti deriba entukar 4WD patut mantaika peminta sida ngagai perintah dikena ngaku lisin enggau setipikit latih deriba sida.
Sapit Menteri Pengangkut (Sungai enggau Tasik), Datuk Henry Harry Jinep madah, setipikit, lisin enggau peneleba deriba sida beguna dikena nyendia latih pemun ngagai bala deriba 4WD kelebih agi ari sukut pengelikun.
Taja pia ku iya, perintah nadai ngembuan undang-undang dikena ngaku lisin deriba 4WD, nya kebuah beguna amat komuniti nya mantai peminta sida ngagai perintah.
“Perintah nadai tagang bekaul pengawa deriba ba off road lalu tu meh kebuah perintah nadai polisi dikena ngaku lisin enggau setipikit deriba raban tu.
“Nya alai sehari tu, nengah Sempekat Pemereti Ati (MoU) ti disain 17 deriba ari mayuh menua ba Asia Tenggara, tu meh maya kitai patut mai pekara tu ngagai perintah ngambi inisiatif kita diaku,” ku iya.
Henry mansutka jaku nya rambau pengawa ngelancharka Akademi Latihan Pacuan Empat Roda Sarawak (Sar4Trac) ba Kampung Barieng, Singai, ditu sehari tu.
Iya ti mega Adun Tasik Biru madah, perintah ulih merambu polisi bekaul entukar 4WD bepelasar ke setipikit, lisin enggau peneleba dikembuan komuniti nya.
“Berengkah ari tu meh kitai patut mansang ke mua ngambi perintah ulih ngaku pekara tu.
“Kebuah pia laban kita ngembuan peneleba deriba entukar 4WD lalu ulih nyadi malin perintah ngaga polisi bekaul setipikit deriba entukar 4WD tu,” ku iya.
