LKIM merambu subsidi minyak berikan diberi setaun sekali

KOTA SAMARAHAN: Opis Pemansang Ikan Malaysia (LKIM) merambu subsidi minyak raban berikan diberi setaun sekali.

Chairman LKIM Muhammad Faiz Fadzil madahka subsidi minyak sebedau tu diberi sebulan sekali enggau penyampau 60 juta liter sebulan.

“Pengawa meri subsidi minyak setaun sekali tu ulih matau chara sida ngelimat minyak dikena berikan.

“Kebuah pia laban penyampau minyak dikena enda sebaka nitihka musim kelebih agi maya musim pengujan,” ku iya.

Faiz mansutka jaku nya rambau aum pemberita di Pengkalan LKIM Tanjong Bako ditu tadi.

Tambah mega ku iya, peminta ikan mega bisi kurang maya musim nya ngujungka raban berikan napi pengerugi sereta enda ngena kesemua penyampau subsidi ti diberi.

“Kami nguji minta subsidi nya setaun sekali ngambika ulih dipatau bepelasarka penyampau minyak diguna sida,” ku iya nerang.

Taja pia ku Faiz, perambu tu agi diperunding Opis Menteri Wang lalu enti sema dikemendar, subsidi minyak deka manggai 720 juta liter setaun.

Kuota minyak ninting bulan mega bisi bida lalu chara tu ngasi agi nentuka genap iku sida ulih ngena manah subsidi diberi nya, tambah iya.

NERANG… Faiz nyaut tanya rambau aum pemberita di Pengkalan LKIM Tanjong Bako ditu tadi.

Suara Sarawak