LONG LAMA: Perambu numbuhka sitak industri ungkup Long Lama deka dipasuk ba Langgur Pemansang Malaysia Lumpar Ke-12 (RMK12), ku Sapit Kepala Menteri Datuk Amar Awang Tengah Ali Hasan.
Menteri Dagang Entarabansa enggau Industri, Terminal enggau Pemansang Orang Dagang nya madah, perambu nya sebaka enggau ke bisi ba Marudi.
Taja pia ku iya, gaya pejalai industri nya deka disetipak enggau komuniti di Long Lama enggau sida ke diau ngelingi nya.
“Pengudah tembu ila, iya deka nyadi palan strategik ungkup sida ti ngaul diri ba industri nginjin pemakai enggau asil pengelandik jari.
“Kitai semampai beratka peminta rayat ti udah dibantai Adun Telang Usan, Dennis Ngau empu ke alai pelilih menua tu patut bisi sitak industri kediri,” ku iya.
Awang Tengah mansutka jaku nya lebuh pengawa ngelancharka program Aram Rejister Dagang Sarawakku Sayang di Long Lama, kemari.
