KUCHING: Lubok Antu diatu status gadung laban nadai ngerikod kes dalam timpuh 14 hari ke udah.
Komiti Penyangga Penusah Ngenyit Nengeri Sarawak (JPBNS) madah, tinggal dua Pelilih agi mengkang ba status kuning iya nya Pelilih Kuching enggau Bintulu.
JPBNS madah, Sarawak seharitu ngerikod dua kes positif Covid-19 baru di Pelilih Kuching ti ngujungka kes nambah ngagai 772 kes ti ngaul kes ke-771 enggau ke-772.
“Kes ke-771 tu ngaul siku lelaki peranak menua tu ti bedaja kuih di Kuching.
“Kes mega mandangka kelai enda ulih tinduk lalu nganjung diri beperesa ba sebuah sepital peribit kena 22 Oktober ti ngujungka iya dikenuku positif Covid-19 kemari,”ku penerang.
Nangkan nya mega bekaul kes ke-772 ti ngaul siku indu peranak menua ari China lebuh diperesa rT-PCR Covid-19 kena 22 Oktober di sebuah sepital peribit di Kuching laban ka mulaika diri ngagai menua asal iya ti ngujungka pemutus peresa iya positif Covid-19 kemari.
Kededua kes nya benung dipansik laban seduai ke dirampit Covid-19 nadai kala bejalai keluar menua tauka ngelawa palan ti bisi kes sereta nadai kaul semak enggau kes positif Covid-19.
“Pengawa nyidi orang ke bisi kaul semak enggau kes positif Covid-19 tu mega benung dipejalai,” ku terang JPBNS.
