BARAM: Lumba injin setinting entara pekit ngerichahka Pengerami Lumba Ai enggau Main Asal ba Lepo Gah, Tanjung Tepalit ditu, empai lama.
Sapit Menteri Ba Opis Menteri Besai, Datuk Wilson Ugak Kumbong madahka diri chukup gagit enggau ransing ati meda semangat sida ti belumba ngena injin setinting nya.
Ku iya, rindu mega semangat lumba tauka bepekit ditunjukka peranak dia ke alai nyau deka semua sida ti diau ngelingi menua nya sampal nurun meda pengerami.
“Gagit endar ati aku meda semangat lumba ditunjukka peranak ditu, bala bukai ke datai sama chapuh meri peransang ngagai sida ti belumba nyengkaum ba lumba injin setinting.
“Mayuh mega tim masuk pekit diatur nyengkaum bala indai ti bela ransing belumba ngena perau, tu ke ngasuh bala richah agi, bela enggai alah,” ku iya.
Ugak ti mega Kaban Parlimen Hulu Rajang madahka pengaga ati pengudah dipebasa bejadika Pengerami Lumba Ai enggau Main Asal ba Lepo Gah, Tanjung Tepalit ditu.
Iya madah, bemacham program enggau pekit diatur nyerumba pengerami sehari nyengkaum lumba perau kayuh enggau lumba injin sepit 15HP kelimpah pengawa bukai.
“Pengerami baka tu ukai semina dikena kitai berami begulai tang mega ulih nyadi pelasar ngerapitka tanggam kaul entara peranak enggau bala tuai.
“Nya alai ba aku, maya bisi pengerami baka tu mih awak pemadu engkeman ngundang rayat seraya ngaul sida semak agi ngambi kitai nemu peminta renggat baruh,” ku iya.
Sama datai Kaban Parlimen Baram, Anyi Ngau, Adun Telang Usan Dennis Ngau enggau Adun Murum, Kennedy Chukpai Ugon sereta bala bukai.
Malam dulu ari nya, Ugak udah dikangau nyadi temuai dipebasa ba Pengerami Makai Lemai Ngenang Jasa Kepala Pengajar Marie Bernadette anak Michael Inting ti pinchin gawa, ex-Kepala Pengajar Sekula Primari (SK) Kuala Kebulu, Jelalong Tubau.
Ngena peluang nya, Ugak ngarapka iya ti udah pinchin gawa deka terus mujur enggau gerai sereta terus gawaka pengelantang komuniti. Kennedy Chukpai Ugon enggau bala tuai raban bansa sitak Jelalong Tubau mega bisi datai ngulu pengerami malam nya.
