ARTIKEL

Abdul Karim (tiga kiba) begambar begulai enggau (ari kanan) Nasir, Robert Lu, Morshidi, Ahmad, Sunny, Shaifulbahri sereta pemenang Kategori Tebuka. - Foto: UKAS

Lumba SEA 2027: Sarawak ngining nyadi tuai rumah tenpin boling

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Opis Menteri Nembiak, Lumba enggau Pemansang Orang Dagang Sarawak (MYSED) ngembuan pengandal besai ke Megalane Sarawak, Batu Kawa, ulih dipilih nyadi kelang tenpin boling ba Pekit Lumba SEA ke deka diatur di Malaysia.

Juluk ati nya dibantaika Menteri MYSED, Datuk Seri Abdul Karim Rahman Hamzah, ti mega madah ke diatu, Perintah Nengeri enggau Perintah Besai benung berunding bansa lumba enggau main ti deka diatur Sarawak enggau Kuala Lumpur.

“Diatu kitai benung berunding enggau Perintah Besai ulih ngatur sebagi ari lumba enggau main ulih dipekit ba Sarawak.

“Pia mega, sebagi ari lumba enggau main tu ila, iya nya tenpin boling, dikearap ulih diatur ba Sarawak.

“Kitai mega bisi fasiliti diri empu ti chukup meruan sereta ulih dikena ba pengawa ngatur Lumba SEA.

“Aku berasai temegah ati enti sema sebagi ari lumba enggau main, iya nya tenpin boling, ulih diatur ba Kuching,” ku Abdul Karim.

Iya bejaku munyi nya lebuh rambau bejadika Pengawa Nutup Pekit Tenpin Boling Antarabansa Sarawak (SIOTBC) 2024, di Batu Kawa ensanus.

Ngenang silik agi, iya ke mega Menteri Dagang Temuai, Industri Kreatif enggau Seni Pemerindang Sarawak (MTCP) madah baru, Perintah Sarawak seruran meransang serakup lumba enggau main tauka gerempung ukai dikuasa perintah (NGO) ngatur mayuh agi pekit lumba sereta main antarabansa dikena nyungkak agenda pemansang enggau nambah kualiti lumba sereta main di nengeri tu.

Ku iya, nya setipak enggau visyen MYSED ti deka ngangkat Sarawak nyadi kuasa lumba enggau main di menua tu.

“Pia mega, MYSED enggau MTCP seruran nyikap diri ba pengawa lumba sereta main di Sarawak, ngambi ulih meri pemaik kelebih agi ba industri dagang temuai.

Sama bisi datai, Kaban Kaunsil Nengeri, Senator Datuk Ahmad Ibrahim, Sekretari Mendam MYSED, Morshidi Fredrick, Tuai Penulung Sekretari MTCP, Nasir Lariwoo, Presiden Gerempung Tenpin Boling Amatur Sarawak (ABAS), Sunny Si Poh Teng, Sapit Presiden ABAS, Shaifulbahri Shukri, enggau Mandal Residen ABAS, Robert Lu Nam Min.

Atlit menua, Ahmad Azriq Izamuddin ti ngarika National Podium Squad menggi gelar champion SIOTBC 2024 pengudah ngalahka pemekit ari Singapore, Jonovan Neo Ze Min (Trinity Academy), ba renggat kepenudi Kategori Tebuka (Last Man Standing).

Ahmad Azriq ngelabuhka pin sepenyampau 192 lalu ngulihka perais mata duit RM20,000 sereta trofi seraya Jonovan ke ngelabuhka 174 pin tepantup ati bulih RM10,000 sereta trofi.

Penuduk ketiga diempu Muhammad Syazirol Shamsuddin, ke mega ngari ke National Podium Squad lalu nerima perais mata duit RM5,000 sereta trofi seraya Nabil Aiman Mantaib ngari ke Sabah Sukma Team ba penuduk keempat nerima RM2,500 enggau trofi.

Ba kategori ‘Classified Master’, atlet Sarawak, Chong Jun Foo (ABAS), diangkat nyadi champion pengudah ngelabuhka 2096 pin, penuduk kedua Muhammad Hafiz Darwisy Azhlan (Penang/MMBC) enggau Edric Lim Xian Jun ari Singapore ( Trinity /Academy ) ba penuduk ketiga.

Kategori Biak Ari 25 Taun (Stepladder) meda Muhammad Hafiz Darwisy Azhlan (Penang/MMBC) nyadi champion, Tsen Fan Yew lumur dua enggau Nabil Aiman Mantaib lumur tiga.

Ba kategori senior lelaki, pengari Singapore, Rick Tan, enggau Adam Chew Yin Choi bela ba penuduk lumur satu enggau dua seraya penuduk ketiga dipenggi Robert Lu (ABAS).

Lalu, ba kategori senior indu, Datin Rakia’Ah Ali diangkat nyadi champion, seraya Michelle Wong enggau Datin Zarina Halim ba penuduk lumur tiga. – EDISI UKAS

BERITA LAIN

BERITA TERBARU